შხვადოშხვა (რომეო აქუბარდია)
- ვითოსუმ წანერი...
თოლეფ გუმოშინანს სქანი, სათუთუას უგუგებუს...
თუთას ონჯარუდუ სქანი, მურიცხ ეკოხედუ ყებურს.
- მუმაშ ზუკოლი სქუაშო
მუდგა საქვარს მეთხუნქ ხესინ, საუჯგუშოთ ოკო აკეთე. პოტიკალა დო ზირტიკუათ ქართუქ-და, წინდაშა ვა ღირუქ. მუდგა ოხუ სქან საქვარსინ, ირფელი ოკო გიჩქუდას, ოკო ინჭუაფუდე თე კურსით, ვარა ექსპერტი დო პროფესიონალ ვარექ-და მუშ მოღე რექ აბა? დილეტანტეფი დო მაგურუეფი ტორკჷ ე გოტანტალერ ქიანას. ბრელ იკითხი, ბრელ იგურე, ბრელ იფირქი, სქანდე უმოს უჩქუნან ფერეფს ქოკითხი. გიჩქუდას, ნამდა ჩილათეფი დო გურიშ გოტახუეფი ბრელი გაღვენუ. ბრელს თოლშა ვა მოუდოხოდუქ, ბრელს ენჯარებუ სქან წიმიულაშ, მარა ეცალეფს ჸუჯი ვათხუა, მიკიშქვი, ინეფი ქიმკიტახანა კინჩხის სქან ჩარიაშ უმშო ხოლო. სი გუძიცე, „ქო, მართალი რექშო, უწი“, გური შხვანერ აჸინა დო ეგჷბა ჩეგეთხუანინ. ვედეკინა მაჸალეთ სქან მანგურ კოჩი, სქან უმოს რჩქინელ დო გონათაფილ რჸუნდას ხასილას, წორი ზუკოლიშ მუმაჩამალი დო ქოთ ჯგირს დო ქოთ გილახას პიც გიწინსინ ფერი. ვედემაჸალა „ბირა – სხაპუაშ“ ვიშო მუთუნს ვარწყენან ფერეფს, გაჭირებაშვანს მაართა რანწკის თინეფი მუგოტენა დო „ჸუჰუს“ ხოლო ვა თქუანა. ბრელ ფირქი ჯგირი რე, სქან დუც გოჩინებაფუანს, მარა გვალო ვეგნაჸუნე ოკო ფირქის ხოლო. კათა გიჸორდას, მიდგა თინა ვა რდასინ, მაართა რანწკის - დიდა დო მუმა. შხვაშ ჩილათეფქ ლური ვა დაიფენთას დო რინა ვა გაიმწარას, რშუდას, ნამდა ჭუმან სი შილებე ხოლო უმოსო მეჩირთენ. დღას ვეგიხუნუა ჭკვერ რექინ თინა, ვარა ნტერეფი გაჸვენუ დო მუშო გოკო. დუდჲდოკუნელჲ რდა დო არზი ქეშგეკითხეს-და, თიმ შვანს ქოთქვი ხვალე, წყჷნარაშე დო გითოჸუნელო. თაშ გაკეთენქ-დ,ა სქან რინა ხიოლით დო ბედინერობათ იჸი ეფშა, ვარ-და იჸუაფუქ ხუმაფილ ჯაშ ნოჸელაცალო, ნამუთ ამარ–ამარ გამკოტორხუ დო მიდგარენ ბადიდი დოჭუნს დაჩხირს დო ქიმკიტიბუანს მუშ ხოშხოშამ ხელეფს.
- ან დო განიშ ესთეთიკა
კოჩის ბრელ შეულებ ძღაბულუას ჩელაია ქარღადის, ნაღაფულა ან დო განიშ მაფურ დიდორებაშენ. სამანგო: ბჟაშ გილაკერკელინშენ სარკალია ცარგვალს. ვარ-და დამორჩილიშ ბორიათ დუნაჯიკეფი, ჯაშე მუკნალეფი ფურცელიშ ნიარშენ, მარა მუდგა ვა ჭარენ დო ვა ხანტენ, ბოლოშა თეშ ეჭარუა უშულებუ რე, ღორონთუმე, უშულებუ! ვარ-და დიჭარენო ჸოროფილ კოჩიშ თოლეფიშ ციცინი, ნამუთი ბჟაშ ჩხორიაშ ენასარკა სინთეცალო მიშეჭკირუ შურიშ სიტომბაშან. ვარ-და ცირაშ სვისვალი გოძიცა, მუჟამს მორდებუანო გაიმანგენს ცაშფერ, გვირალ თოლეფს დო ხიოლით კუჩხეფი ათკაკიჩუნ. ვარ-და აგოთანაშ სირგილე, ნამუთ თეშ გიჰამუანს მუჭოთ დიდაშ ხეშ მოფუჩონაფან. ღორონთი რე საუჯგუშო მახანტალი დო მაჭარალი, არქიტექტორი დო კონსტრუქტორი, ექიმი დო ფსიქოანალიტიკოსი. ჩქი, უძალე დო გუმოჩიჩინაფილ კათას, ნამუთ გური მაძახუნა ჯგირი დო სქვამიშ კათებაჸურენ, ხვალე მეგურაფა შემლებუნა თე მოსოფელიშ სარკო დო რსულჸოფირელი ნერიშ. აბა მის გუგებ რსულჸოფირუაშ ქარღადიშა სრულჸოფირელო გინოღალა, თენა დუდიშ ღორება იჸიდჷ დო მეტი მუთუნ ვარი.
- ჸინიშ ცა
ზუღას მუკი-მუკი გიშმეძირე დუდიტვირა კოკეფი. პოპორეფი მიკმახორცქუ ქუალეფით მორანწკილ ძგას. ჯიმუამ ჰავა იქაქალ დო პიჯის ჯიმუშ გემოს გიტალენს. გეჸუნქ წყარიშ გინნატებ გოღარკულერ ღოზის, ნამუთ იგინძორებუ ირიათო. კუჩხუჩაფლე რექ. ქვიშა ათქაჭაბუ შოლირ ნარჩაკუჩხიშა. თხითხი კაბას ბორია გიფიორუნას. აკოონჯუა რე, ბჟა ინულას ლამენს. მოსოფელს ცა მუნოქუნს ჸინიშ თხითხი რჩელიცალო. სი ორცებენქ: „ჸინიშ ცა ქათოპჸუნდას კუჩხეფშან, გემოშა ქიფცეგურენდი, ღორონთუმე!“. ჭე მუკოკინელიშე ონდეთ ელგარჩქილე ჸუჯიშა ბაღანეფიშ კარკაცი, ნამუთ ქვიშაშე ბორულ–ბორულ ფიგურეფს ორთუნა ალბეთ. ასე არძო გიჸორს, ნტერი დო გლახაშ მაზალებერი ხოლო, ნამუთ ვა რჸუნს. გური დო შური თიცალი რჩქალი დო შვიდი გაფუ, ნამდა არძაშ უმოს ტომბა დო ელუნჭაფ ფირქეფი დო არზეფი, ბეთჰოვენიშ სიმფონიაცალო ელგარჩქილე.
- წარმოწანა
წარმოწანაშ არძო ბორჯის მუშ ხიბულჲ უღჷ. აფუნს ირფელჲ პეულანს დო შურჲ ადგუმუ. ჯალეფს სარკოთ გემუანჲ დო ჰამო შური ეკალენა ნოჸელეფშე. მაფურინჯეეფი ართუნა მუნეფიშ ოდაბადეს დო მიახიულუნა თეს. თოლჲ გარძღუ დო გური ეგაფშაფუ მუდგარენ ემაღალებურ გინაფათ დო სი ხოლო ფურინუაშა მუთა გორკჷ. ბზარხულს ხომ შურო მუშა თქუა. ირფელს წვანე ფერი გინოძჷ, ითამ „გრინჩის“ უკერკელუნია თაქ დო ქიმკუსუმალუნია სიწვანა. ზუღაშა ანჭუაფ არძოს დო ჩხანაშ ჩვარჩვალერეფი გილულა. მოწონა უჩა ფერჲ — „ფასონჲ“ რენია. რანწკის გიმათუთა გერე, მოწყინაფილჲ ცირაცალო. მალას ორთა ორქოშ ანაფორას ქიგნიქუნანს დო ტაროზ ბორიეფს გეიოჸოთანს. ჩხურუშ სიმპტომეფჲ იჭყაფუ. კათა ქორგეფიშ ჸიდირს იჭყანს. დო ბოლოს, გურიშ ნარტი ზოთონჯი — ხელეფგოსკანჩილჲ ბჟაკამჲ ბაბუ, მაღალ–მაღალი დო გურჸინჲ. ირფელჲ დიფორუ აგონიაშჲ მანგურჲ გინაფათჲ დო მინშა შურჲ ხოლო თიცალჲ მონკა გაფუ, გოკონდა ოქუმიშ სქიბუ გერჯანუნია.
- „ჭიჭე კათა“ დო „დიდი კათა“
ნოქურეფით რე ფორილი დიხაუჩა, მიშ დო მიშინ ენა ხვალე ღორონს უჩქ. იმპერატორეფს დო ჭკორეფს, ჭკვერეფს დო ბორუეფს, გიმმაწურაფალეფს დო გეწურაფილეფს გილუგაგინნა თაქ. მინქ თიცალი საქვარი წიმიჭყჷ, ნამუთ ამდღარ დღაშა იგინძორებუ, მინიშ საქვარქ მუშ ღურაწკუმა ართო დიხას ქიმიონთხორეს. ირო რდუ „დიდი კათა“ დო „ჭიჭე კათა“. „დიდი კათა“, მუნეფიშ რინათ, მოსოფელს სისქვამეს დო ხიბულს უძინანდეს, სისტემას თირანდეს, სტერეოტიპეფი ტვერო მეუღუდეს. ვა ჸუნდეს ჩილი დო სქუა, ვა უღუდეს ვერეხი ჸუდეეფი დო ვა ფირქენდეს „ჭუმან მუ ბჭკომავან“. გილეშეს კუჩხუჩაფლეთ, სოდგა გიასერუდესინ თექ გიოთანდუდეს. მუთუნ ვაპალუდეს პუხუს გიანჯირუდუნ ეფერი. მუნეფიშ ხანობას კათაშ უმენტაშობაშე ვარებული დო მუწოტებული რდეს ჩილნაღურა ოსურცალო. მუჭო ჟი ფშინეთინ თეშ, რდუ ჭიჭე კათა ხოლო. შურს მუთუნ ვაპალუდეს „შიბა დო შიბაშ“ მეტინ ეფერეფი, მუნეფიშ რინათ დიხაუჩას ამონკენდეს დო ბჟას შულიდუნდეს და ვარა, მეტი მუთაშ მოღე რდეს. ეფშა აფუდეს სხვინ ორქოთ, მარა ომბოლს ხიტას ვარ, ნოფუჩხუს ხოლო ვემეჩანდეს. ბრელი ჸოფე თეფერი დო ენა არძოს გვალო ჯგირო მიჩქუნა. „ბორჯი მაფენსია, დო ვართ მაფეფია“, თქუანა. ბორჯიქ არძო გამორს დო გოწილოხ, დღაში ჯგურა კამარიაქ იჸუ ირფელქ. ირფელქ დო არძოქ მუში ნანდული ნერი ქაძირუ. ათეთი რე ბორჯი ჯგირი რენ, დაჩხირცალო აწკონდარენს ირფელს.
- ესარკუაშ ეპოქა
მუშენ რე კათა შხვაშ ესარკუას ოცადუნ? მუშენ ოკო ართი კოჩის მაჟირა კოჩო რდასინ? მეშენ რე ბოშის ძღაბო რინა ოკონ დო ძღაბის ბოშო? მუშენი რე კატუს ლალუა ოკო დო კიბოიას ჩხომობან? გასაკვირე რე, თეცალი კვარჩხი კორნებეფი მუშენ იკვირდებუნა კოჩიშ გურს? ინდივიდუალურობა რე კოჩის ასქვამენს დო ხიბულს უძინანსინ ვარა ართფერუანობა დეფექტი დო კილი რე. „ქიგეგი მი რექ დო ვათირუა სქანჲ დუდი“ იჩიებუნა ფსიქოლოგეფი. ქოთჲ მართალი დო გურიშ ემაკუნალი სიტყვეფი რე მარა... მარა, სო რე აშჲ. დუდჲ ქინლიკილუე ოკო ოთაღუშა ართჲ მარათჲ დო ქიფირქე, მი რექ დო მუ გოკო თე რინაშე. სქანჲ გურიშ გურშა ოკო ქენიჯინე დო ფულირჲ არზეფჲ ძიაცალო ქიგიბუნუე ოკო კისერშა. უკული ჭარჲ დო ჭარჲ მუსხი გოკონჲ. შხვას ვალაჸუნა დო ვეგემანგა, მუშო გოკო გურქ ფუჩხათ გინგართასინ.
- ფსიქოლოგიურჲ თხობელუა
ჸოროფა
მა სი მიორქ! თე ზიტყვეფჲ ბრელს ეკომშქუმალუნა პიჟიჯე, ბოლოშა დარწუმებულეფს, ნამდა მართალს იფჩიებუთუნ. ჸოროფა ღორონთიშე მუნალი ძღვინი რე. „ღორონთჲ ჸოროფა რე“, ჭარჷ ქრისტეშ არძოშ უმოს საჸოროფო მოციქულქ, იოანექ. თინა უმოსო მიშინუანს ჸოროფას მუშ ეპისტოლეს, ვინდარო შხვა. გურს მოიჰამუანს ზიტყვეფი - „ჯიმალეფჲ გიჸორდანჲ ართიანი“, ვარდა - „ვა გიჸორს ჯიმა ნამუსუთ ორწყეთ-და, მუჭო გეჸოროფებუ ღორონთჲ, ნამუსუთ ვარწყეთინ?“. მართალო-დო ვარჲ ნძალიერჲ დო ნტერს ქოიჸოროფუანსჷნ ფერ ზიტყვეფი რე! ჸოროფა ბრელჲნერი რე. ნათესეშ, მაჸალეშ, რომანტიულჲ დო პრინციპეფშა გერსხილჲ ჸოროფა, ნამუსუთ ადამიერჲ იშ გურშენ ვეგმოხანტუნს, მუს ოჰამუნჲ (სამანგო ნტერიშ ჸოროფა მითინს ვაჰამ), მარა ოხვილური რე დო ჟიშე მუმალჲ სიჭკვერა ითხინსინ თიშენ გუმოხანტუნს თის. ჸოროფას ვა უჩქჷ „მა“. ჸოროფას უჩქ „სი, სი დო ხოლო სი“. ჸოროფა უგურჸებუ რე გოჯოგებაწკუმა. მუშენ? შემკითხებუქ სი. მუშენ-და ჯგირჲ გიჸორდასინ, გილახა ოკო რჯოგუდას. გიჯოგუე ოკო ირფელი თუდონი, ირფელი მუთჲ ცოდამჲ დო მოწიკვილი რე თე ქიანაშ ეგოცენტრიზმის შურით. ალბეთ თქუანქ — მი ჸოფე ბოშ ე იდეალისტჲ დო მიამიტია! მარა გიჩქუდას, კოჩიშობას ხვალე ჸოროფათ ელნაფუცქინა ზუკოლჲ გინასქილიდუანს!
- კოჩიშობა ღორონთიშ რკვიებას
ნამდგა ქიანას ვარდე ერჩქინელინ, ბორო რდე ოკო კოჩჲ, ნამდა ვა ძირე, მუნერჲ დიდი გოლინა უღჷ რელიგიეფს მილიონეფიშ დო თინეფჲ შქას სქანჲ რინას ხოლონჲ. კათოლიკეფჲ, პროტესტანტეფჲ, მართლმადიდებელეფჲ, ინდუსეფჲ, ისლამისტეფჲ, იეჰოვაშ მოწამეეფი, სინტოისტეფჲ დო მუ გიმაკოროცხუნს ხოლო მუდა დო მუდა რელიგია, ვარ-და კონფესია რენ. (გარჩქ სო რე კოჩჲ ერჩქინელინ). ბჟადალს მოძჷ ათეიზმჲ. ეურენ განშე კათაშ უმოსობას შურო ვა წანს ღორონთიშ. კომუნისტურ ქიანეფს ხომ შურო მუშა თქუანქ. მარა გურიშ გაჩამალჲ რე, მუჭო ეთმონწყუნს ართ-ართ ლექსიკონ ზიტყვა რელიგიას: „დოდგჷმილჲ, დორსხუაფილჲ თოლწონუა. მუდგარენ იდეაშ, პრინციპიშ ვარ-და ზნეშ ურაგადუო ართგურალა“. თე ენწყუმას ქიმუვაჸუნუთ-და გიშმურს, ნამდა ირ კოჩი, ათეისტეფჲ დო აგნოსტიკეფიშ უგშუსხუნუო, მუდგარენ გაგებათ რელიგურჲ რე, მუდგა ვეტახაფუანდას თესინ. კათაშ უმოსობა მეჸუნს მუნეფიშ კინოხონეფიშ რელიგიას, ალბეთ სი ხოლო. ბრელჲ თქუანს, „მა ჩქიმჲ რელიგია მიღჷ დო ვა მილამჷ მითინწკუმა თეშენ დება, თენა ჩქიმჲ საქვარჲ რე!“ თაშით რე, რელიგია დასურო-დო ვარჲ, კოჩიშ დო ხვალე კოჩიშ საქვარჲ რე დო მითინს ვა უღჷ ნება მიშეპოტიკას კოჩიშ შურსუნ. რელიგიურ ტრადიციეფჲ კოჩის კინოხონეფშე გინაჩამუ. ათეშენ მუჭოთ თაშინ, ჩქი ჩქინჲ კინოხონეფიშ რელიგიურჲ იდეეფიშ მიმაჸუნალეფჲ ვორეთ დო ბრელშო რელიგია ფანიაშ ტრადიციათ რე გინორთელჲ. მუ გიშმურს ასე? გიშმურს თინა, ნამდა ფაქტობურო რელიგიას ჩქინ მანგიორო შხვა გიშმაგორუნს. ჩქინ რელიგიურ თოლწონუა თიშა გარჩქ, სო ეფრჩქინდით დო იბრდითინ. სიმართეს მორკებულჲ ვარე ართ ისტორიკოსიშ, არნოლდ ტაინბიშ ზიტყვეფჲ: „თინა, ნამ რელიგიაშ მიმაჸუნალჲ იჸუაფჷ კოჩინ, გარჩქჷ გეოგრაფიულჲ ტერიტორიაშა, სოდეთ თინა ერჩქინდუნ“. გურიშ გაჩამალჲ რე თენა! ქიჸიდუო თი რაგადჲ თინჲ, ნამდა რელიგია, ნამუთ ჯვეშშე ჯვეშიშე ათოპუნან, აბსოლუტურჲ სიმართე დო სითინუე რენ? ფთქუათინ, სი იტალიას ერჩქინდიკონ, კათოლიკეთ დორნათუნდეს, ინდოეთის - ინდუსო დო პენჯაბეს — სიქხო. სქან დიდა დო მუმა პაკისტანშე ქორდესკონ, მუსულმან იჸიდჲ. დო ბოლოს, „გაიმართუკო“ დო სოციალურ სახენწჷფოს გერჩქინელედიკონ, გოშანშალერჲ ათეისტჲ იჸიდჲ. კოჩიშობას ქიმუჸუნალუდუკო პრინციპაშა „ნამ რელიგას ეფრჩქინდინ, თისით ბღურუქიან“, ამდღარ დღაშა ვეგშმართედეს დო დუდამო ნწყვილჲ იპიდით შამანობაშ დო სექსუალურ ორგიეფიშ ეფშა რელიგიეფს, სოდეთ ბაღანეფიშ ზისხერჲ რცუ ღორონთეფიშ ზისხერიშ ოწიმუს მეწენდჷ დო დიდალეფჲ დუდს ღორონთიერო გინაფულენდესინ. კათა ართიანს დოჸვილუნს რელიგიაშენ, ბრელს დოჭარუნს თიშო დო ქოთ დოღურუ თიშო, მარა ქუას ქუას ქიმნოდვანს დო მუთუნით ვა დოდირთუ, თინა ითხინსინ თეშ. ჩქი გვარიან რელიგიურეფჲ ვორეთ თიშო, ნამდა ართიან ბჯოგუდან დო ვართ ხოლო თიშო, ნამდა ართიან მიჸორდანინ. კათა შურჲ დო გურით ორთჷ უბადობას, თის რელიგიურჲ გინაფეფჲ ქუხვიცუანს-და. (ინკვიზიციეფჲ, ჯვაროსანულჲ ლიმეფი, ალქაიდა დო შხვ).
- ბჟაშჲ ენასაკრა
ართშა უწუ თუთუქ ბჟასჷ
ორიჟინანქ ჭუნქ ქანასჷ,
დოშქირტჲ წართი, მუშო მოკოქ
მა ვორექჷ მირგატჲ, ორქოთჲ.
ბჟაქ ქურჩქილუ ჭიჭე ხანსჷ,
ქიგიოკაშ შური მონკათ,
მა დობშქირტენ, მი გინგარსჷ,
მი მოიღანს წყარსჷ კოკათ?..