მაიმუნი დო სათოლე
| მაიმუნი დო სათოლე by [[Author:ივან კრილოვი|]] |
| ორიგინალური ნინა რუსული. ორიგინალური ჯოხოდვალა Мартышка и Очки. გინმათანგალი დენის ღვინჯილია |
მაიმუნქ თქუ, დიბრჩინი, თოლცჷ
სინთე ვამიბაღჷნია,
რაგადანა თე საქმესჷ,
მუშ მოხვარა უღუნია.
ორჩჷნელცჷ კოცჷ ხოლო,
თურმე სინთე ოკორდ თოლო
სათოლესჷ გეკეთენცჷ
ირფელც ორწყე, აკეთენცჷ.
მეტი ვაკო მუთუნიდა
თეშენ დუცუ გინობდვანქჷ,
მუზმა მოკო, სათოლეფც,
ქიბშინქ დო ქჷმიბღანქჷ.
მიდართ, ართიშ მანგიორო,
სოლედგა რენ ქჷმიღ ჩხორო,
ფიქრენც ასე გებკეთია
სხაპუნც მაიმუნი ბორო.
გეჭოფ, ოკო გამორსასჷ,
იშო-აშო გეგნანწკარჷ
კუდელიშა ქჷმიციკჷ,
კჷდჷრიშა ქიგინწკარჷ.
მინც გედოხოდ, მინცჷ ქაჩჷ,
გილებუნუ ჸუჯეფიშა,
არძა ართო დოშაყარუ
კჷლენწკარჷ ხუჯეფიშა.
შური უნთხუ, იცხვანტალჷ,
მურე თიქჷ ვაქიმინჷ,
საშველქ ვეჸუ, სათოლეშა
ადგილქ ვემიარჩქინინჷ.
გურქ ქჷმურთჷ მაიმუნცჷ,
"გებხანგი დო გებშერია"
სოფელც მუდგა თქუესჷნი
ხათე მუშენ დებჯერია.
სისუნელეს გევაჸუნი,
თენა ჯგჷრი ჭკუა რდუო,
თე სარკეში ნოტეხეფი,
სინთეს მომიძინანდუო.
განჯარებულ მაიმუნქუ,
დოშაყარუ სათოლეფი,
არძა ქუას ქიმკატახჷ,
ნაწვალები, ნასოფეფი.
თენა თის რაგადანცჷ,
საქმე ოკო ქიჩინენი,
ოქიმინალც მუჭო უჯგუ
თეში ოკო ქიმინენი.
სო ოკო დო მუჭო ოკო
გური ოკო გოუჩენი.