არზეფი დო აფორიზმეფი

From Wikisource
Jump to navigation Jump to search

არზეფი დო აფორიზმეფი[edit]

ბერნარდ შოუ[edit]

  • ჩქინი ნინაშ სისქვამას ხვალე თიმწკჷმა ბგინაფულენთ, მუჟამც თინა შხვაშ ქიანაშ ცაშ თუდო მარჩქილენან.

გარსია ლორკა[edit]

  • ირფელიშ უკაბეტაშ დო თიწკუმა ართო ნარღამ ხიოლი რე პოეტო გორჩქინა, შხვა ირფელი პოტიკი რე, ღურა ხოლო...

ალბერტ შვაიზერი[edit]

  • წჷმოძინა ვა რე ბედინერალაშ კილა. ბედინერალა რე წჷმოძინაშ განჯამალი. სი ქოგიჸორს თინა მუსჷთ ორთუქჷ-და, სი წჷმოძინელი იჸუაფუქ.

ალექსანდრე ბელი[edit]

  • მუჟამც ართი კარი იკილჷნ, მაჟირა ინჯამუ; მარა თიცალი შხირას, თიცალი შორსდო ნარღით ეფშათ კინმიბჯინეთ კილერჲ კარიჸურე, ნამუდა ჩქი ვა ვორწყეთ თი ართის, ნამუთ ჩქინო გითმინჯამუნ.

ბლეზ პასკალი[edit]

  • ჩქინი ამდღანერი წჷმოძინეფი, ჩქინი გოღანერი ფირქეფშა რე გერსხილი. სი ამდღა თექ რექ, სოდეთ სქანი გოღანერი ფირქეფქ მოიჸონესჷნ დო იჸუაფუქ ჭუმანი თექ, სოდეთ სქანი ამდღანერი ფირქეფი გიღანსჷნ.

გოეთე[edit]

  • ხვალე გიჩქუდასჷნ ვა ბაღჷ, ჩქი გიმიბრინუათ ოკო თინა.
  • მუჭოთ ვარენო სქანჲ დუც სი ქენდებუქინ, თიმ დღარშე სი გაჩქვენუ უკულჲ მუჭო ოკო დოდირთენ.

დომინიკ სლივერი[edit]

  • ჟირინერი კათა მიჩქუნა ... ართჲ, მითჷ შარაშა გეწურაფას თხულენს დო მაჟირა, მით მუშით გიოდირთუ მუში შარასჷნ. ჟირიხოლო მითმიოჭირინუანს მუში მიოულარჲ აკანს, მარა გურიშ ბაღინალა, ათი მაჟირაშჲ, ბრელო უმოსი რე.

ედნა მილეი[edit]

  • მოხიოლჷ თაშნე აკაბუცხა თოჸუჯის ვარზენდი ჯგირი ზუკოლსჷნ; თინეფი გომითოლწონებუდჷკონ, შილებე მა გინობსქილადედიკო ნამთინე ჩქიმი გურგაჩამალი ჩილათეფს.

ელეანორ რუზველტი[edit]

  • ირდღას ქიმინი ართი მუდგაინი, მუდგაშათ გოშქურჷნ.

ენდი უორჰოლი[edit]

  • იჩიებუნა, ბორჯი თირანსია მუდგარენეფს, მარა ბონას ქობთქუათჷნ, სი ოკო თირუე თინეფი სქანით.

ერიხ მარია რემარკი[edit]

  • მითინქ შილებე ვა გინირთას თიცალ ურცხოთ, მუჭოთ თიქ, მიდგა წოხოლე გიჸორდჷნ
  • მელანქოლია თინწკჷმა გორიუ, მუჟამს რინაშე, თელარაშე ფირქენქჷნ; ცინიკოსო თინწკჷმა გინირთუქ, მუჟამს ორწყექ, მუთ გინმაშქვანს ადამიერეფიშ უმენტეშობა თე რინასჷნ...
  • ოსური ჸოროფაშე იხერძელებუ, კოჩი ჭკუას ოდინუანს.
  • თე ქიანას ირფელშო დიგორუ არდგილი, ხვალე ადამიერიშ არდგილი ვეგორე სოთინი.
  • მუდგას დიჭყოლიდუანქჷნ თინა უკული თელი სქანი რინას გორკჷ.

თედორე დოსტოევსკი[edit]

  • მუდგა გენიალური, ახალი, ვარა სერიოზული არზიქ ვამოირთას დუდშან, იშენი სქიდუ ირო თიცალი მუდგარენი, მუთ შხვა ადამიერეფშა მუთუნით ვა გინგაჩე, გოკონდა თელი ტომეფი დოჭარენ; ირო რე მუდგარენი თიცალი, მუთ მუთუნფერაშო ვაგმურს სქანი ტვინშე დო ირო სქანწჷმა დოსქიდუ -თეში მიდურქჷ თე ქიანაშე, ნამუდა სქანი თარი იდეა მითინიშა ვა გინგაჩინე.
  • მუთუნიშა ვა გოშქურუდას, ვართჲ გაშქურინას დღას, ვართჲ ჯაბის მიაჩა. ხვალე ნარღიქ ვა მიგოკორდას დო ღორონთჲ ირფელს გაპატიენს. თე ქიანას ვა რე დო ვართჲ შილებე ორდას თინერჲ ცოდა, ნამუსჷთ ღორონთჲ გურით მონარღეს ვა აპატიენსჷნ. ადამიერს ვართჲ შეულებჷ ქიმინას თინერჲ დიდჲ ცოდა, მუთ ღორონთიშ უგუთებუ ჸოროფას წყარშა გიოჸოთანსჷნ. მუთუნჲ გიწონებუნანო თინერჲ ცოდა, ღორონთიშ ჸოროფას უმონდასჷნჲ? ხვალე უგურკებუ ნარღიშე ისოფჲ დო შქურინჲ ედომუშამო გაგშირაჸჲ. რწანდას, ნამუდა ღორონთის სქანჲ ცოდაწკჷმა ართო უჸორქჷ თეშჲ, დუდო სი ხოლო ვა გიჩქუნჲ. ბრელჲ ხანიშ კინოხჷ რე ნათქუელჲ, ნამუდა ჟინცას უმოსჲ დიდჲ ხიოლს იჭანუანს ართჲ მონარღე ცოდამჲ, ვინდარო ვითჲ მართალჲ. მეუ დო მუთუნიშა ვა გაშქურინას. ადამიერეფშე ვა გეწყინას მუთუნქჷ, ათოლუაფაშე ვა გერღვინჯა. ღურელს მუთ უწყინებაფუაფჷნჲ, სქანჲ გურს ირფელჲ ქაპატი დო გურით გერიგჲ. ქონარღენქჷ-და, გიჸორს ქოთ. ქოგიჸორსჷ-და, თიწკჷმა უკვე ღორონთიშ მოშელე ხოლო რექ. ჸოროფა ირფელს გიშეჸიდენს, ირფელს ოხვარჷ. მა, სქანინერჲ ცოდამჲ კოჩქჷ, გურჲ ქომიბშიმორე დო შეგიცოდი-და, ღორონთის უმოსჲ ვა შეულებუნო? ჸოროფა თინერჲ არხამა რე, ედომუშამჲ ქიანეფიშ გიშარსხას ქოშიგოლებაფუანს, ხვალე სქანს ვარინჲ, შხვეფიშ ცოდეფსჷთ გიშეჸიდე.
  • ჸვერე რდჲ, ჸვერე! მარა ღურელჲ რექჷ, მუთუნჲ ვა გარჩქილე! სი მუ გიჩქჷ მუ ედემს მილგორინუანდინჲ. ჩქიმჲ გურს რდჷ თე ედემჲ დო თი ედემს მა სქანჲ მუკი ვოპეულაფუანდჲ! ვა გიჸორდიკო გოკონ-და, მუქჷ მოხვადჷ უკულჲ? ირფელჲ იშენით თეშჲ იჸუაფუდჷ, იშენით თეშჲ დოსქიდუდჷ. ხვალე, ირფელს ქომეჩიებუდჲ, მუჭოთ მაჸალეს – გებხარებუდით დო გიბძიცანდით ართიმაჟირაშჲ მიმაჯინე. გოკონჲ შხვა მიდგაიჸინი ქორჸოროფებუდჷკო. თის კარკაცით ქაჸუნუდინჲ, მა შოშეშ მაჟირა განშე ქელგოჯინედჲ… ოჰ, ქორდას ათაშჲ, ქორდას ათაშჲ, ხვალე თოლჲ გელანჯჲ, გოკონჲ ართჲ მერქათ, ხვალე მერქათ! ქელმოჯინჲ წოხოლენცალო, მუჟამცჷთ წოხოლე აწომიდირთჲ დო ელმოფუჩე, სქანჲ ართგურჲ იპუაფუქიანჲ! ჩქიმჲ თოლეფს ირფელს წეკითხენდჲ.

ჰაა ურჩქინჯალა! ჰაა, ორთა მართაფუ! ხვალახე ვორეთ არძო თე ქიანას – თენა რე ჩქინჲ უჩა დღა! „ქორენო და კოჩი თე ქიანას შურდგუმილჲ?“ კიჟინუნს რუსჲ როკსოფუ. როკსოფუ ვა ვორექჷ დო მახოლო ბკიჟინუნქჷ, მარა მითინჲ ვამარზენს გამას. რაგადანა, ბჟათ უდგუნია შურჲ თე ქიანას. მარა ქელაჯინით ბჟას, თინა ხოლო ღურელჲ ვა რენო? არძო ღურელჲ რე, ირდიხას ხვალე ღურელეფჲ რენა, ხვალე ადამიერეფჲ დო მუკი-მუკი შურუბუმობა – ათენა რე თქვანჲ დიხაუჩა. „ართიანჲ გიჸორდანჲ კათეფს!“, – მიქჷ თქუ თენა? მიქჷ დომიჩინეს? მუ უგურეთ, მუ გურიშ წუმაჸონაფალო იწკანტჷ საათჲ…

იაკობ ბრაუდე[edit]

  • ქაწირინე თოლშა, მუნერი ძნელი რე სქანი დუდიშ თირუა დო ქომეხვადუქჷ, მუნერი ჭიჭე შანსი გიღჷ შხვეფიშ თირუაშ ცადებაბორჯისჷნ.

ლეონარდო და ვინჩი[edit]

  • ტერი, ნამუთ სქანი ჩილათეფს კილმაარგამენსჷნ, უმოსი მორგე რე, ვინდარო მაჸალე, ნამუთ თინეფს ხეს გინმუფორუასჷნ!

მიხეილ ჯავახიშვილი[edit]

  • მოუთხილეთ არძოს, მით ვეძიცანს, ვართ იბირს, ვართ შუნს დო ვართ არშიყენსჷნ. თენერ კოჩი სამოთხეშა გემგაპეჯენს დო ჯოჯოხეთშა ქოგიჸოთანს დუც.

ომარ ხაიამი[edit]

  • ოჸოროფული ადამიერიშ კილი ხოლო მიჸორა, ოდო გოჯოგელი კოჩიშ, ღვალა ხოლო ბჯოგუნა.

პაულო კოელიო[edit]

  • გურით ქჷგოწვადილჷ მუთუნი-და, ედომუშამი მოსოფელი მუგეხვარებუ თიშ ეჸონაფას.

პოლ ვალერი[edit]

  • მითინქჷ ნარჩა კუჩხიშჲ გოსირქუა ქჷდოგიჭყჷ-და, გიოსხაპჲ დო გოჭყილონტჲ, სოიშახჷ ჩამინჲ ვა დოუჭყაფჷნჲ.

რიჩარდ ბახი[edit]

  • სი ირო გიღჷ თიშ დუდიშალა სქანი გაღა დოთირუენ დო გეგშეგორე შხვანერი მუმალუ, ვარა შხვანერი ულირინ.
  • მითინი ქოგიჸორსჷ-და, დუდიშულო მიაშქვი. დირთჷ-და სქანი რე; ვარი და ვართ ჸოფე დღას სქანი.

შარლ მორის დე ტალეირანი[edit]

  • ნძალაშულობაშ კონკაშა ვარ არწიშორო ოკო ეშაფურინე ვარა გვერცალო ეშახოხე ოკო - სანარღოთ მა ფურინუა ვა შემილებუდჷ.

ჯეკ ლონდონი[edit]

  • ადამიერი ეკონია ეფემერა რე!..
  • ჯოღორიშა აწოჸოთამილჲ ძვალჲ ვა რე ჭყოლოფა. ჭყოლოფა რე მუჟამც ჯოღორს გოურთუნქჷ ძვალს თიწკჷმა, მუჟამც დუდო ხოლო ჯოღორცალო შქირენულჲ რექჷნჲ.

ვიქტორ ჰიუგო[edit]

  • ართიშა მა ბძირჲ უღვენჯჲ ჸოროფილჲ. თის გიორთუდჷ ჯვეშჲ ქუდჲ, მუკაქუნდჷ აკოსოფილჲ პალტო დო აკორგინჯილჲ მადვალარეფჲ მაძუდჷ, მარა თიშჲ შურიშჲ ინოხჷ მურიცხეფჲ ინოჭვიანდეს.

ბეთჰოვენი[edit]

  • ჩქიმჲ ართჲ მაჸალექჷ ხოლო ვენოლას ოკო უჩა დღას თეიშახ, სონდარო მა, გოკონჲ ქობალიშჲ აკა ნოჭკერია ქომაპალუნჲ. ჩქიმჲ ჯიბე ჩოლერჲ ქორენ-და, მუ რაგადი ოკო თიშჲ მოხვარა ი წუნს ვა გიშურს, მორო თენერჲ შვანს, შურ-შურაიათ ქომუკოვუდოხოდე ოკო ტაბაკის დო დობჭარე ახალჲ მუსიკა, თიშო ნამუდა ჩქიმჲ მაჸალე მუთ შილებენჲ ნჭუაფილო გეშიბრსხე მუშჲ ჭიროთიშენჲ.
  • ჸოროფა რინაშ გურგინი რე, თიშა მიშმურს ირფელი.

ჩარლი ჩაპლინი[edit]

  • ირო ეცადჲ თინა ორდენჲ, მითჲ დასურო რექჷნჲ დო ვართჲ ხოლო თინა, მითჲ ოკონა ნამუდა ორდენჲ… გიჸორდას თინა, მით დასურო გურით გიჸორსჷნჲ დო ვართჲ ხოლო თინა მისჷთჲ ოკო ნამუდა უჸორდენჲ… ჩეჟიერჲ საქვარიშენჲ მანგიორჲ დღას ვა მითხუა, რახანჲ ჯგირიშჲ ქიმინუა ბჟაშინერი რე, ანათენს დო ოტიბუანს… ჸოროფილქჷ მიგოტუ-და, ვეკათხოზა, რახანჲ ვა ნოჸოროფუექჷ თეშჲ, მუჭოთჲ თეს იინალუანდინჲ… ართგურჲ რდა თიშჲ, მითჲ დასურო ართგურალაშჲ ოჭარაფალჲ რენჲ დო ვართჲ ხოლო თიშჲ, მითჲ ალგოფუჩანსჷნჲ… ქომეხვარჲ თის, მითჲ დასურო ოხვილჷ მოხვარას დო ვართჲ ხოლო თის, მითჲ რთხულენს, ქომეხვარენჲ… აკოკვაჭილჲ დო გინმაჭყვიდუ მომენტის რგილჲ ჰონიათჷ გოსხუნჲ, რახანჲ რისხვინუაქ შილებე უგუშუთინუ ჩილათა ქოგოქიმინაფუასჷნჲ… ქოდიჯერჲ თინა მუსჷთჲ სქანჲ თოლით ძირუნქჷ დო ვართჲ ხოლო თინა, მუთჲ ოკონა ნამუდა დიჯერენჲ… ძივთჲ ქომუნოდვჲ თის, მუთჲ გიღჷ ამუდღანჲ, რახანჲ მითინს ვა უჩქჷ მუ იჸუაფჷ ჭუმანი… ვენირზა თის, მისჷთჲ სქანჲ ვა არჩქილენჲ, რახანჲ უმტყუანობა ნირზის ვებადებუ… დღას ვა თქუა, ნამუდა ღორონთჲ სქანწკჷმა ვა რენჲ, ვარინჲ იხვამჲ თიშო, ნამუდა თინა ირო სქანწკჷმა ორდასჷნჲ! დო ბოლოს – ირფელქჷ თექჷ ქოშიგალებუ-და – თაშჲ კოროცხჲ ნამუდა სქანჲ მოულა თე ქიანაშა დასურო ქონოღირუე!!!

ბუასტი[edit]

  • გორითჲ თინერჲ ადამიერეფჲ, მიწკჷმა ართო ჩიება ჯგირჲ წინგიშ მანგჲ რენჲ, დო გორითჲ წინგეფი, ნამუეფუშჲ კითხირჲ გაღიერჲ კოჩიწკჷმა გორაგადინს ომანგუდასჷნჲ.

ჩერჩილი[edit]

  • ირო ხაზირჲ ვორექჷ დიბგურუენჲ, მარა ირო ვა მოპწონს მუჟამც მოგურუნანჲ.

ალბერტ აინშტაინი[edit]

  • მა ქჷდიბგურე უჯინე ღურას, მუჭოთ ჯვეშ ვალს, ნამუთ ორდო იჸინო, გვიანსო, ოკო გინიბგენჲ.
  • ირი ადამიერი ვალდვალირი რე, დოურთინუას ოქიანუს ირიშჲ უკულაშჲ თიზჷმა ვარა, მუზჷმათ თიშე ეჭოფუნჲ.
  • არძაშე ძნელი გაგებელი - თენა რე მუშნალიშ გინაგაფური.
  • მუ შეულებჷ ჩხომს უჩქჷდას წყარიშ გეშა, ნამუსჷთ თინა თელ მუშ შურდგუმას გილანჩურუნსჷნ?
  • ჭიჭე რჩქინა ოშქურანჯი რე, მუჭოთ ბრელინჲ.
  • ხვალე თიწკჷმა გარჩქილე მუდგარენი ჯგირო, მუჟამც სქანი ბებიშა ხოლო ეგანწყინენჲ.
  • დიხაუჩა ოშქურანჯი არდგილი რე თინეფიშ გეშა ვარი, მით უბადოს ორთუნჲ, ვარინ თინეფიშ გეშა, მით თეს ირფელს, მიოჯინე დო მუთუნს ვართუნჲ.

ონორე დე ბალზაკი[edit]

გიჸორდას თინა, მით ელაიჩანსჷნჲ, დო ვართ თინა, მით გოცქვანსჷნჲ.

გაბრიელ გარსია მარკესი[edit]

  • ადამიერს უღჷ ნება მაჟირა ადამიერს უჯინას ჟიშეშე თუდო ხვალე თი შვანს, მუჟამს თის წჷმოდგინას ოხვარჷნჲ.

რიხნერი[edit]

  • ადამიერი აკა შურდგჷმილი სქილედი რე, ნამუსჷთ უჩქჷ, ნამდა ოკო ღურასჷნ.

ოსკარ უაილდი[edit]

  • მიდგას თოლი ულირშა ოსქიდუნ, თიშჲ ოჭარაფალჲ რე, ნამუდა მუმალი ვაუღჷდასჷნჲ!
  • ფარა ირო პესიმისტის გიწერსხი. იში დორთინაფას ინა ვემელუდას იჸუაფჷ უკული.

კარელ ჩაპეკი[edit]

  • ქაწირინეთ თოლშა, მუ შურუბუმობა იჸუაფუდჷ ქიანას, ადამიერეფჲ ხვალე თის ქიჩიებუდანჲ, მუთ უჩქუნანჲ.

ფრიდრიხ ნიცშე[edit]

  • დიდი საქვარეფიშ ქიმინუაქ ვა შიგალებეს და, ენა იშა უჩქუნო, ნამუდა თქვა ვერგუდითინ? თქვა ვერგუთუ-და, ენა იშა უჩქუნო, ნამუდა ვერგჷ თვითან ადამიერინ? დო ადამიერი ვერგუნ-და - მუ ბღოლათ, იშენით წიმი!
  • "ჩქი ირკოჩი ღორონთიშ აჸვილარეფ ვორეთ"

თიქ ნათ ჰანი[edit]

  • ათე მომენტიშა ტომბას გურიშჲ გოჩამათ, ჩქი უჯგუშო შემილებუნა გებგათ ჩქინჲ ულირი დო უჯგუში მუმალუშო შემილებუნა მიბხაზირათინჲ.

ელბერტ ჰუბარდი[edit]

  • დიდჲ კოჩჲ თიწკჷმა რექ, მუჟამც შეგილებჷ კრიტიკა თეშჲ გეჭოფე, ნამუდა წყინაქ ვალგაკათას გურშანჲ.
  • კრიტიკაშ ეჩილითაფა ქუგოკო-და, ვა ქიმინა მუთუნი, ვა თქუა მუთუნი, მუთუნი ვარდა შურო.

ჯოზეფ ქოსმანი[edit]

  • სქანჲ შვენაშ მორსება ქუგოზალუნ-და, ეცადჲ ქიგიშინე, მუშ გურშენჲ ნარღენდჲ ართჲ წანაშ წოხოლე ამდღანჲ.

მარკ ტვენი[edit]

  • ირჲ დღას ქოქიმინჲ მუდგაიჸინჲ, მუთ ვაგოზალჷ ნამუდა ქიმინენჲ, თენა რე ორქოშ წესჲ თიშა მიორჩქვანაფალო, ნამუდა თქვანჲ ოქიმინალი საქვარეფი უჭვებუო ქიმინათ უკულინჲ.

უილიამ სომერსეტ მოემი[edit]

  • ნამთინე კათა თექ ვებადებუ, სოდეთ ოკო დებადასინჲ. ჭარაქ მინჲ სო დახორუ დო მინჲ სო, მარა თინეფჲ ამუდღა დო ამუსერჲ უჩინებუ ოდაბადეშ ნარტის რენა. თენერჲ კათა დუც შხვაშჲ თურო გინაფულენს დორხველჲ ოდაბადეს დო ბაღანობაშე ნაჩინებუ ჯალონჲ დო კათათ გოფშა შოშეეფჲ თინერჲ გიორენჯეფო აძირუაფუნა, სოდეთ ჭე ხანით ოკო გეჩენდე დო უკულჲ სქან შარა ოკო აგინძორენჲ. თინეფჲ ედომუშამჲ თელარას ოდაბადეს მუკმულა მოჯგირეეფჲ დო ხოლოშიანეფჲ შქას, მარა იშენით შხვაშჲ თურჲ ქიანას ორდანინჲ თეშჲ გინაფულენა მუნეფიშ დუც დო ირო ემაფურინალო რენა გახაზირებულჲ.

ბერნარდენ დე სენპიერი[edit]

  • ოსურეფი თი ქიანას რენა თოთმაცეფი, სოდეთ ქომოლ-კოჩი ტირანი რენ, ნძალაშ მერინაფა ირდიხას ქართახანობას გუთმაჭყანს.
  • ახალეფიშ უმენტაშობას დასაბაღი ღვალა ვა უღჷ, მუში ბორჯის ქიმიჸონას ჩილინ დო სოიშახ ბრელი ღვალას იშინდასინ, ეიშახ სირჩინუე ხოლო მუთმაჭიშუანს. ახალობას შხვაშ ოსურეფს ოჩილითუანა, ოდო სირჩინუეს მუნეფიშ ჩილეფიშ ჸოროფა ვაჭარუნა უკული. ახალობას შხვეფს ოჩილითუანა დო სირჩინუეს მუნეფი დუთმოსქიდუნა ჩილათირო. თენა ქიანაშ მუმანწყუალი სამართებუანობაშე მანგიორიშ გინოგაფა რე. ართიშ უპილანე ნაქიმინას, მაჟირაშ უპილანე ნაქიმინა აართმანგენს. თენერი ქარსანაკი რინა თით უმოსო გითმიდგუნს მუში ჩხვიჩხვეფს, მუთ უმოსი ჭიჭე მუდანობაშ კათაშ ხეს აკმიშაყარუ ღვალან. ბაღის ჭიჭე ჯალეფი ვეხერენს, თინეფს დიდი ჯალეფი ქაორანსჷ-და. ქიანა ხოლო თენერი ბაღის გჷ. მარა შხვანერო ხოლო მუთმოხვადუ, დიდი ჯალეფიშ მორჩილ რიცხუს შეულებჷ ბაღი გასქვამასჷნ. სახენწჷფოშ ჯგირობუა ხოლო მუში დოლმახორეეფიშ უმენტაშობაშა, თინეფიშ წორწოობაშა რე გერსხილი დო ვართ ხოლო ღვალიერი კათაშ მორჩილ ბუნაშა.

აბრაამ ლინკოლნი[edit]

აბრაამ ლინკოლნიშ მინაჭარა სქუაშ მაგურაფალშა:

"ოჸოროფულ მაგურაფალი, თის უღურალეთ ოკო უჩქუდას, ნამდა ირკოჩი ვარე ჯგირიშ მაქიმინჯე, მარა თინა ხოლო მოკო გეგასინ, ნამდა ირი აშხარა კოჩიშ უკახალე გერგეზი გერენ, ქუდაგურეთ თის: ირი ნტერს მაჸალე მიშაფულჷ, ქუგაგებაფეთ, მუ რე მარცხება დო ქუდაგურეთ გომორძგუაშ გეშა გურიწყულ ხიოლი, ქუდაგურეთ წინგიშ ძივთი დო ორთაშ სისქვამათ ჰამება, ქინუჩით: მარცხება ბრელით უმოს კოჩანიერი რე, ვინდარო ტყურა დო ქვირთოსანობა. მოკო, ჩქიმ სქუა მუშ იდეეფს მეთხოზუდას თიმწკუმათ, მუჟამც მასა ხუჯის ვარზენს თისინ! მოკო ქუდაგურუათ გოძიცა მოწყინაფილობაშ ჟამს. თის ოკო უჩქუდას, ნამდა შეალებე მუშ ინტელექტიშ გიმოჩამა, მარა შური დო გური ადამიერიშ დღას ვა გიმიჩამუ! ჩქიმ სქუას მუშ დუდიშ რწუმა ქაღვენუაფუ-და, თინა შხვა ადამიერეფიშ მეხჷ ხოლო რწუმას ვა მიოდინუანს! ქუდაგურეთ, ხვალე ართის რთხიინთ, გურშა ვეხუტოლუათ, რახან რშუდან: ხვალე დაჩხირს გიშმეჭკადუ ფულანდი!"

ნელსონ მანდელა[edit]

დუდიშულ ორდენ, ხვალე ის ვაშანენს, ნამდა შხვაშა ვარდე მიკოკირილინ, ვარინ დოდირთე თეშ, ნამდა პატის არზენდე დო ანძალიერენდე შხვეფიშ დუდიშალას.

ოშო[edit]

ხვალახობაშ გენტირა, ჸოროფაშ გენტირა რე. თენა პარადოქსო მუგაძირე, მარა ენა აშ ვა რე. თენა რე რინაშ უნტყუანობა: ხვალე თი კათას, მისით ხვალახობაშ გენტირა შეულებჷნ, შეულებჷ ჸოროფა, შეულებჷ მუშ გურიშ შხვაშა მეჩამა, შხვა კოჩიშ გურიშ ტომბაშა ინონჭაფა - თი შხვა სკან დორხველო ვარდასინ თეშ, თი შხვაშა მიკობუნაფილ ვა რდენ თეშ, შხვაშ დაჩიჩიებაშ უმშო დო თი შხვაშ უმშო რინა შეგილებუდასინ თეშ. თინეფ შხვეფს არზენა ედომუშამ დუდიშალას, თიშენ ნამდა თინეფს უჩქუნა, მიდულა თინეფ მუნეფიშ რინაშე-და, თინეფ თიშნერინე ბედინერეფ იჸუაფუნა, მუნერით ასე რენან. თინეფიშ ბედინერობა მითინს ვაღინე, თიშენ ნამდა თინა მითინს ვემუჩამ თინეფშა.

სტენდალი[edit]

ღორონთს გურ გინაფულენს დო ვართ ხოლო გაღა, თენა რე თახმი რწუმა.