Эрзянь ёвкст (М. Е. Евсевьев, 1928)/46
| ←Ёвкс 45 | Эрзянь ёвкст (1928) , edited by Евсевьев, Макар Евсевьевич Ёвкс 46 |
Оглавление→ |
| Эрзянь ёвкст (скаскат). Пурныньзе М. Е. Евсевьев. СССР-энь Наротнэнь Центральной Издательствась. Москов, 1928 |
БУКИНЕ МАРТО ПСАКИНЕ.
Эрясть-айшть атят бабат кавонест. Ульнесь сынст уське пуло букинест, келей рога бараност, сивекс кирьга яксяргост, кичкере толга атякшост, кудо ваны псакинест.
Бабась мери атястень: „Атя, печкик букинесть, сывель пидитянок!”
Атясь човась пеель и лись кардайс букинень печкеме. Букине неизэ пеельсть и тусь ардозь вирев. Печкикскельсе атясь баранонь — баран-гак оргоць вирев. Оргоцть вирев яксяргост-как, атякшост-как. Кадовсть атят бабат сывельтеме. Эрясь, эрясь — псакинестак тусь вирев.
Эрить весе скотинаст вирьсэ. Сась сёксь. Псакине кармась кельмеме. Мольсь сон букиненень и мери: „Букине, а букине, давай кудо тейдянок, ато сы теле — кельмитянок.” Букине мери: „Давай! Адя ансяк бараноньгак терьцинек, седе курок кудось тееви.”
Мольсть бараннэнь и мерить: „Баран, а баран! адя мартонок кудонь тейме, теле сы кельмитянок!”
Баран мери: „монь понам покш, мон кудовтомо-як а кельман, — а молян мартонк кудонь тейме”.
— Адя яксяргонь терьцынек, а моли-ли яксярго мартонок кудонь тейме?
Мольсть яксяргонень и мерить: „Яксярго, а яксярго, адя мартонок кудонь тееме, сы теле кельмитянок!”
— Мон чувто ало-як теленть печтяса, а молян мартонк кудонь тейме!
— Ада, бука брат, атякшонь терцынек, атякш а карми-ли мартонок кудонь тейме?
Мольсть атякшнэнь и мерить: „Атякшке, а атякшке, адя мартонок кудонь тейме, — сы теле кельмитянок!”
— Мон жерьдя ланксо-як теленть печтяса, — а эряви монень кудо.
[ 134 ]Мурдасть мекев псака марто букинеть и кармасть кавонест кудонь тейме, и тейсть паро кудо.
Сась теле. Букине маць кашланкс, псакине томбаланкс.
Кармась якшамось баранонь крутямо. Сась баран вальмалов и мери: „Псакине, а псакине, нолдамак моньгак кудозот эрямо!”
Псакине мери: „Мон а-здан, кевстик букинень.”
— Букине, а букине, нолдамак кудозот эрямо!
— А нолдатан, мери букине: кудонь тейме мартонок эзить сакшно!
— Коли а нолдасамизь, мон кудонк кечкериса и сон калады, тыньськак кельмитядо!
— Ну совак ино! мери псакась.
Совась баран и маць киякс кунчкас.
Кармась кельмеме яксярго. Сась вальмалов и мери: „Псакине, а псакине, нолдамак кудозот эрямо!”
Псакине мери: „Мон а-здан, кевстик букинень.”
— Букине, а букине, нолдамак кудозот эрямо!
— А нолдатан, мери букине, — кудонь тейме эзить сакшно!
— Бути а нолдасамизь, весе пупоненк тарксесынь, тыньскак кельмитядо!
Ну, совак ино! мери псакинесь.
Совась яксярго, маць эзем пряс.
Кармась кельмеме атякш-как. Сась вальмалов и мери: „Псакине, а псакине, нолдамак кудозот эрямо!”
— Мон а-здан — мери псакине — кевстик букинень.
— Букине, а букине, нолдамак кудозот эрямо!
— А нолдатан, кудонь тееме мартонок эзить сакшно.
— Бути а нолдасамизь, кузян кудо-потмарозонк, весе моданк почаксаса, тыньскак кельмитядо!
— Ну, совак ино, — мери букине.
Совась атякш и куйсь лавця ланкс.
Юты кудонть вакска нумолонь стада. „Те кинь кудось?” — мерить нумолотьне и кучть ве нумоло вачамонзо.
[ 135 ]Ансяк нумоло чалгась поровт ланкс, баран стясь и стук! стукаць пильксэнзэ кияксос. Нумоло седеензэ-як сезизе — тандаць. Тусь ардозь ялганзо вакс и мери: „Адядо тестэ седе васов, кудосонть азорось вельть благой и а мазы. Мон совамо-як кудостень эзинь кенерть, кода стукатьсыньзе пильгензэ лангозон, мон седеем-гак сезия — тандадынь.” Тусть весе нумолот кудонть ваксто.
Юты кудонть вакска ривеськень стада. „Те кинь кудось?” мерить ривеськетне и кучть ве ривеське вачамонзо.
Совась ривеськесь кудостень и ваны, кинь кевстемс. Кода букине кирьнавты кашланкстонть. Ривеське седеензэ-як сезизе — тандаць и тусь ардозь ялганзо вакс. Ялгатне кевснить: „Я, ки эри кудосонть?” Ривеськесь мери: „Адядо тестэ седе васок — азорось вельть кежев, цют монь эзьмем машт.” Тусть ривеськетькак кудонть ваксто.
Юты кудонть вакска верьгизэнь стада. — „Те кинь кудось?” — мерить верьгистнэ и кучсть ве верьгис вачамонзо.
Совась верьгизэсь кудостень и ютась кудо кунчкастень. Кода стить букине марто барат, кода кармить эснэнзэ кечкереме, весе боканзо лазнызь. Яксярго чийни эземганть ды пижни: „вак, вак, вак!” Атякш чийни лався ланга и пижни: „ко-ко-ко! ко-ко-ко!”
Кода бути менсь вергизэсь, арць ялганзо вакс и мери: „адядо тестэ седе курок, тезэ авольть сак. Монь кой-как менинь, мерькасть, мерькасть эснэнь. Вейке чийни эзем ланга ды пижни: „так, так, так!” А омбоце чийни лавця ланга ды пижни: „Подай сюды, подай сюды!” Ладна сенень эзинь понк!” Тусть верьгистак кудонть ваксто.
Кадовсть атянь бабань скотинаст ськамост вирьстень. Ней-гак эрить тоско.