Эрзянь ёвкст (М. Е. Евсевьев, 1928)/45
| ←Ёвкс 44 | Эрзянь ёвкст (1928) , edited by Евсевьев, Макар Евсевьевич Ёвкс 45 |
Ёвкс 46→ |
| Эрзянь ёвкст (скаскат). Пурныньзе М. Е. Евсевьев. СССР-энь Наротнэнь Центральной Издательствась. Москов, 1928 |
РИВЕЗЬ МАРТО НУМОЛО.
Эрясть, айшть ривеське марто нумоло. Ривеське пуць ловонь кудыне, нумоло — ловажань. Лись чизэ — ривеськень кудозо солась. Мольсь ривеське нумолонь кудос и панизе нумолонь. Нумоло лись кудостонзо и аварьди.
Юты скалонь стада. Мольсь нумоло вакс скал и мери: „Нумолнэ, а нумолнэ, мейсь аварьдят?”
— Кода а яварьдян, кудостон ривеське панимем. Монь кудом ульнесь ловажань, сонзэ ловонь; лись чизэ — сонзэ кудозо солась. Сась монь кудос и панимем!
— „Адя, мон сонзэ паньса!” — мери скалсь.
Мольсь кудонть вакс, кечкересь, кечкересь кудосонть, ривезь тензэ эзь паневть. Вансы скалсь — стадастонть васов кадовсь, кепедизе пулонзо и тусь ардозь.
Севть удало юты бука: роганзо покшт, конязо келей. Мольсь нумолонть вакс и кевксни: „Нумолнэ, а нумолнэ, мейсь аварьдят?”
— Кода а яварьдян, ривеське кудостон панимем! Монь кудом ульнесь ловажань, сонзэ ловонь. Лись чизэ — сонзэ кудозо солась. Сась монень, и панимем!
— Адя, мон паньса! — мери букась.
Мольсь букась кудонть вакс. Кечкересь, кечкересь кудонть эйсэ, — роганзо-як мик сивсть, а ривеське яла теке эзь паневть. Вансы букась стадастонть васов кадовсь, — кепедизе пулонзо и тусь ардозь стаданть мельга.
Мейле юты алашань стада. Мольсь нумолонть вакс алаша и кевкстизе: „Нумолнэ, а нумолнэ, мейсь аварьдят?”
— Кода а яварьдян, ривеське панимем кудостон!
— Адя, мон паньса!
Мольсь, пстиесь, пстиесь кудонть эйсэ — пильгензэ-як весе яжинзе, ривеське тензэ эзь паневть. Тусь чамордозь стаданть мельга.
[ 132 ]Севть удало ютыль пек вадря айгор. Мольсь нумолнэ вакс и мери: „Нумолнэ, а нумолнэ, мейсь аварьдят?”
— Кода а яварьдян, ривеське кудостон панимем! Сонзэ кудозо ульнесь ловонь, монь ловажань. Лись чизэ — сонзэ кудось солась. Сась монень и панимем!
— Адя, мон паньса!
Мольсь айгор: брынк! пстиди, брынк! пстиди. А ривеськесь кудосонть ащи ды пееди.
Айгоронь седе-як пек састь кежензэ и давай пстиеме. Пстиесь, пстиесь, — кенжензэ-як весе яжавсть, а ривеське яла теке тензэ эзь паневть. Тусь кенжевтеме стаданть мельга ардозь.
Севть меельсекс юты саразонь стада. Ве сараске мольсь нумолнэ вакс и мери: „Нумолнэ, а нумолнэ! мейсь аварьдят?”
— Кода а яварьдян, ривеське кудостон панимем!
— Адя, мон паньса!
— Тонеть-ли паневи! — нумолось мери, аволь истят букат, айгорт паньцть эйсэнзэ — эзь паневть!
Мольсь сараске кудонть вакс, — клюкась, клюкась кудонть эснэ, — эзь паневть тензэ ривеське.
Севть удало юты атякш моразь. Пачкоць нумол виц и мери: „Нумолнэ, а нумолнэ, мейсь аварьдят?”
— Кода а яварьдян, ривеське панимем кудостон, — cонзэ кудозо ульнесь ловонь, монь ловажань. Лись чизэ, сонзэ кудось солась. Сась монень и панимем!
Адя, мон паньса! мери атякш. Моли кудонть ёнов, соньсь моры: кикирики, атякш сы, лавто-ланксонзо ружия канды, бокасонзо пшти сабля!
Маризе ривеськесь и тандаць. Пецька ланксто скокаць эземс. Атякш яла моры, сонсь сови кудостень. Ривеське эземстэ кирнавць вальма ланкс, вальма ланксто ушов и тусь вирев. Истя панизе атякш ривеськень. Нумоло совась кудозонзо и ней-гак эри эсэнзэ.