Эрзянь ёвкст (М. Е. Евсевьев, 1928)/32
| ←Ёвкс 31 | Эрзянь ёвкст (1928) , edited by Евсевьев, Макар Евсевьевич Ёвкс 32 |
Ёвкс 33→ |
| Эрзянь ёвкст (скаскат). Пурныньзе М. Е. Евсевьев. СССР-энь Наротнэнь Центральной Издательствась. Москов, 1928 |
КУПЕЦЕНЬ ЦЁРА.
Эрясь атят-бабат ве сюпав купець. Ульнесь сынст вейкине цёраст. Купецесь прась — кулось, козяйказояк мельганзо. Кадовсь цёрась ськамнензэ.
Пурны нищеень тейтерьне. Совась купецень цёраньте. Тейтерьнесь тусь купецень цёранть мелезэнзэ. Сон озавтызе тейтерьненть чайде симме и кармась кевстнемендэ — ули-арась сонзэ мезезэяк.
Тейтерьнесь мери: „Монь меземгак арась, — мон уроскеян, арась монь а тетям, а авам”. Купецень цёрась мери: „Дай вейс венчатано!” Тейтерьнесь мери: „Арази тон сайсамак монь, — тон купецень цёраят, мон нищеень тейтерян, — тон ансяк раксят лангсон!”
— „Арась, а раксян.” Сынь венчасть, и эрить и эрить. Козейкась тондавсь пек превей.
[ 101 ]Тусь купецень цёрась ярмункав. Тосо васоцьть вейс колмо купецть.
Ве купецесь кармась прянзо шнамо: „Монь козейкам пек паро.” Омбоце купецесь кшны прянзо: „Монь козейкам пек сюпав!” Купецень цёрась мери: „Монь козейкам коть бедной, нищеень тейтерь, ды пек превей.”
Ве купецесь мери тензэ: „Превей козейкат ды монь вечксамам!”
Купецень цёрась мери: „А кемдян! Ежели алкукс вечктянзат, азё туи сырьнень кирьгашанзо, ды сурстондо именной сурксонзо, сестэ кемдян”.
Купецесь тусь, не кадовсть учомонзо. Сась сон тейтеренть бабанстэ и мери: „Пекстамак сундукозот и ускимак вензэ лангс нуцькать туртов, мерьть тензэ Саровов молян, валське мекев саик сундуксть, мерьть а молян Саровов. Куломозот карман истя андомот, кода моньсь карман ярсамо!”
Бабинесь пекстызе купеценьть сундуконьте, ускизе сундуконьть нуцьканстэ и мери: „Молян Саровов, самозон ванынк сундуконьть”, — а сонсь тусь.
Чопулгаць. Купецень козейкась каинзе кирьгашанзо и сурстондо сурксонзо. Маць и матедевсь. Лись сундуконьть эйстэ купецесь, саинзе сурксонть и кирьгашатьнень и мекев совась сундуконьте.
Бабинесь валське сась и мери: „А молян Саровов, ускинк мекев сундуком!” Ускизь сундуконзо кудов. Купецесь лись сундукстоньть и тусь мекев ярмункав. Невтиньзе кирьгашатнень купецень цёраньте и мери: „Не кирьгашатьне тоньть козейкать?”
— Монь козейкан, — мери купецень цёрась. — Ну, коли вечксак монь козейкам, именияськак тонть улезэ, мон а молян, только тон паник монь козейканть крёстонзо марто.
Купецесь мольсь именияньтень и панизе купецень цёранть козейканзо. Козейкась оршась цёрань понкст-панарт и тусь мастор ланга якамо. Якась, якась — [ 102 ]пачкоць инязоронь стада вакс, и сразу стаданть вакснэ лугась кайсь. Кильдетьне справналгацть. Ёвтасть инязоронте: „Стаданть вакс сась та кодамо ломань, и колмо чис весе кильдетьне справналгацть.” Инязорось терьдизе те ломаненть эсинзэ вакс и кевстизе: „Кодамат тон ломанесь?” Сон мерсь: „Кодаман? пингень эрян, сё истяк якан, — а родням, а меземгак арась.” Инязорось мери: „Сак теск эряк”. Сон кадовсь тоск, и эри и эри.
Весьть сон кевстизе инязоронть: „Мезе мон хочу кевстеме, — нельзя-ли вейс мастор лангонь галахнэнь пурнамс?”
Инязорось мери: „Можна!”
И пурнынзе вейс галахнэнь, аравлинзе вейке полкс и мери: „Ну, ванокшнок, ки тенть эряви”. Кармась купецень козейкась якамо ютковаст. Якась, якась — содызе эсинзэ мирьдензэ и мери инязоронте: „Те ломанесть марто можна ве ве удомс?” — „Мезе мейле, — удок!”
Мацть сынь ве таркас и кармась галахось купецень козейканть кевсьнемензэ: „Мейсь тонеть мон истя эряван? Кодамат тон ломанесь?”
Купецень нись мери: „Мон вана кодаман: ульнинь урозонь тейтерьне, туинь пурнамо и совинь купецьнень. Туинь купецень цёраньть превс, — сон озавтымем чайде симеме и кевсни эснэнь: „Молят экшезэнь козейкакс?” Мон меринь: „Сайсамак тык молян!” Сон саимем, и эринек пекь парьсте. Весть тусь мирьдем ярмункав. Тосо колмо купецьть вейс васоцть и кармасть пряст шнамо: ве купецесь мери: монь козяйкам пек паро, омбоцесь мери: монь козейкам коть бедной ды пек превей. Омбоце купецесь мери тензэ: „Превей козейкат, ды монь вечксамам!” Купецень цёрась мери: „Вечктяндат тык, азё туи кирьгашанзо.” Се купецесь сась бабане и мери тензэ: „Сёлгумак сундукозот и ускимак нуцькате.” Бабам сёлгизе сундукозонзо и сундуконть ускизе монень и мери: „ [ 103 ]Кадык сундуком эстеть, мон туян Саровов. Ну чопотець. Мон киргашан и сурксом каинь и мадинь, и матидивинь. Купецесь лись сундукстонть, саинзе кирьгашан и сурксом и таго сундукс кекшсь. Мон стинь — кирьгашан ды сурксом арасть. Валське сась опек бабам и мери: „А молян Саровов, ускик мекев сундуком.” Ускизь сундукондо. Купецесь лись сундуконть эйстэ и тусь мирьдень мельга. Невтинде кирьгашатьнень ды сурксом и мери: „Ну, нароком козейкат вечкса?” — Мирьдем мери: „Нать алкукс. Мон кудов-гак а молян. Азё тон саик весе имениястькак эстеть, ансяк козейкам крёстонзо марто паник.” Сась купецесь и панимем. Мон туинь якамо. Сынь инязоронь стада вакс и сразу стаданть вакснэ лугась кайсь. Кильдеметьне вейкс здоровгацть. Ёвтасть инязоронте. Инязорось терьдимем эсиндэ ваксс и эрян кецэнзэ. И кевстия инязоронть „Нельзя-ли вейс галахнэнь пурнамс?” Инязорось мери „Можна!” Пурнынде вейс, аравлинде полкс и мери: „Ну, ванкшнок, ки теть эряви!” Якинь мон лувганк и тонть содытень.”
Мирьдесь мери: „Неушто те тон?”
— Мон!
— Кода ней опек вейс тенек совамс и эсинек имениять саемс?
Козейкась мери: „Адя, ёвтатано инязороньте.”
Мольсть инязороньте и козейкась мери: „Те монь мирьдем!”
Инязорось кевстиньзе: „Мезенккак ули, арась?” Сынь мерить: „Минек ульнесь истямо, истямо имениямок. Лись истямо тев и имениямок истямо, истямо купець саизе!” Инязорось кучсь се купеценьте конёв, что моли тензэ иньжекс.
Купецесь ацызе килангонть баркатсо. Мольсь инязорось иньжекс не ломатнень марто и маницянть чавизе, имениясь таго ульсь сынест.