Эрзянь ёвкст (М. Е. Евсевьев, 1928)/28

From Wikisource
Jump to navigation Jump to search
Эрзянь ёвкст  (1928) 
Эрзя ломанть, edited by Евсевьев, Макар Евсевьевич
Ёвкс 28
Эрзянь ёвкст (скаскат). Пурныньзе М. Е. Евсевьев. СССР-энь Наротнэнь Центральной Издательствась. Москов, 1928
[ 90 ]

СИЯ-ПЕИНЕ — ТЕЙТЕРЬНЕ.

Эрить-аштить атят-бабат кавонест. Арасть сынст а эйдест, а какшост. Тусь атясь вирьга якамо. Якась колмо иеть и сыргась кудов.

Ютась, ютась, сась симезэ. Ваны — ведь чуди. Комась сон вецтень симме. Ведь-ава кундызе сакалодо и а нолды эснэнзэ. Сон кармась тензэ энялдомо: „Ки кундымем, нолдамак! ули кудосо сисемь иесэ айгором — максса тенть!”

Ведь авась мери: „А эряви айгорот! Алтык, мезьде а содат — нолдатан!”

Атясь таго мери: „Улить кудосо сисемь утомон, пешксеть сюродо — любовой утомо максан тенть, нолдамак!”

Ведь авась мери: „А эряви утомот. Алтык, мезьде а содат — нолдатан!”

— Сисемь ведь ланга ведьгевень — любовойть ведьгевть максан тенть — нолдамак!

[ 91 ]— А эрявить ведьгеветь! Алтык, мезьде а содат — нолдатан!

Атястень а мезе теемс, — ведь-авась а нолды эснэнзэ, — сон и мери: „Улезэ ино тенть, мезьде а содан!”

Ведь-авась нолдызе.

Атясь сась кудов. Кодак пачкоць орта ланкс, лись каршозонзо колмо иесэ тейтерзэ, поводевсь кирьгазонзо и мери: „Эх, тетяй, кода мон учинь эснэть!”

Тетясь мери: „Эх, дочам, или радува пек эзэзэнь, — мон эзинь сода эстэдеть и ведь-аванень алтытень!”

Ну, теемс а мезе. Аварьцть, аварьцть — кармасть эрямо.

Эрясть, эрясть — сась тейтерьнесть туйме шказо. Сонзэ ве икельсь пейзэ сиянель. Педявць сиянь пейсть ланкс шта и тусь. Тетязо макссь мартонзо брус, авазо — гребушка ды сэме.

Ютась, ютась Сия-пейне — понксть каршозонзо сыреть атинеть. Пеест чевшкат, сельмест кечешкат. Атятьне кевстизь сия пейнень:

— Тейтерьне! Эзить нейть ки ланксто Сия-пейне тейтерьне?

— Арась, покштяй, эзинь ней, — Сия-пейнесь мерьсь и тусь вакскаст.

Ютась, ютась — понксть каршозонзо седе-як сыреть и амазыть бабат. Сынь-гак кевстизь Сия-пейнень: „Тейтерьне, а тейтерьне! эзить нейть ки ланксто Сия-пейне тейтерьне?”

— Арась, бабай, эзинь ней, — мерьсь Сия-пейнесь и пеедезевсь лангозост. Пеедьместэ прась сия пейсть ланксто штась. Бабатьне неизь сиянь пейсть и кармасть атятьненень пижнеме:

— Атят, атят, садо тев! тесэ Сия-пейне тейтерьнесь!

Сия-пейне тусь вакстост чиезь. Атятьне-бабатьне кармасть чийме мельганзо.

Вачтась Сия-пейне удалов — атятьне эль сасасызь. Сон ёртызе укшторонь гребушканть. Теевсь истямо [ 92 ]сееде укшторонь вирь — кедьгак пачканзо а тонгови, а сонсь тусь таго чийме.

Атятьне-бабатьне кармасть вирьсть эснэ порьме. Порьсть, порьсть — весе чувтнэнь поризь и таго кармасть Сия-пейне мельга чийме.

Сия-пейне вачтась удалов, таго уш сасыть эснэнзэ. Каизе удалонзо брусонть, теевсь истямо сэрей и крута пандо — нармуньгак троксканзо а ливтяви.

Атятьне, бабатьне кармасть пандонть трокс кузьме. Куйсть, куйсть — койкак кузевсть и таго кармасть Сия-пейнень сасамо. Сон каизе сэменть. Теевсь покш чувто. Сия-пейне куйсь прязонзо.

Атятьне, бабатьне пачкоцть чувтонть вакс и кармасть эснэнзэ порьме.

Сия-пейне серьгець: „Патяй, патяй, патякай! нолдак суре ведьмине — кепедимак менель ланкс”.

Патясь каршонзо серьгець: „Ужо, ужо, сазорнэм!

Мода сокан, каньцть видян!”

Атятьне, бабатьне капшить порить чувтосонть, — пей-сывельстэст верьть чудить.

Сия-пейне таго серьгець: „Патяй, патяй, патякай!

Нолдак суре ведьмине!”

Патясь мери: „Ужо, ужо, сазорнэм! Таргаса каньцтенть!” А атятьне-бабатьне капшить — порить.

Кадовсь чувтось ансяк кирьгань эчксэ.

Сия-пейне таго серьгець: „Патяй, патяй, патякай! Нолдак суре ведьмине: чувтось кадовсь ансяк кирьгань эчксэ!”

Патясь сергець: „Ужо, ужо, сазорнэм, ваявца каньцтенть!”

Чувтось кадовсь ансяк кедень эчксэ.

Сия-пейне таго серьгець: „Патяй, патяй, патякай! Нолдак суре ведьмине, — чувтось кадовсь ансяк кедень эчксэ!”

Патясь мери: „Ужо, ужо, сазорнэм! чалгаса каньцтенть!”

[ 93 ]Атятьне-бабатьне капшить — порить. Чувтось кадовсь ансяк суронь эчксэ — нури весе.

Сия-пейне таго серьгець.

Патясь мери: „Ужо, ужо, сазором! Штерьца каньцтенть!”

Чувтось кадовсь ансяк сурень эчксэ — текень ванок сявори.

Сия-пейне таго серьгець патянстэнь.

Патясь нолдась суре ведьмине. Сия-пейне кундась пезэнзэ и куйсь кувалманзо верев.

Ансяк сон кундась суре пестень, чувтось сяворцьць. Атятьне бабатьне радувасть. Чийсть чувто прястень — Сия-пейне арась. Састь кежест и кармасть вейкест-вейкест порьме.

Сась сия-пейне патянстэнь. Патясь андызе-симдизе и мери тензэ: „Самось сыть, сазором, ды козо кекштян, — монь мирьдем овто, — сы кудов — сэвдянзат!”

Теизе патясь соркс и сор юткс кекшизе.

Сась мирьдесь и мери: „Уй, ломань чине качады!”

Патясь мери: „Кува чоп а якат, мезень чине а пурнат, — тоньсить эйстэ ломань чинесь качады!”

Мирьдесь мери: „Сордо ярцамом сась!”

Патясь мери: „Ярцак, да весе или сэвть!”

Кармась мирьдесь сордо ярцамо. Ярцась-ярцась — весе эсть сэвевть тензэ. Нень юткс кадовсь Сия-пейне-як.

Валське мирьдесь таго тусь якамо.

Сия-пейне лись сортнэнь поцто. Патязо симдизе, андызе.

Ванцызь — таго сы мирьдезэ. Патясь теизе Сия-пейнень жаркс и пизынес жар потс кекшизе.

Сась мирьдесь и мери: „Уй, ломань чине качады!”

Патясь мери: „Кува чоп а якат, мезень чине а пурнат! Эсить эйстэ ломань чинесь качады!”

Мирьдесь мери: „Жардо ярцамом сась!”

Патясь мери: „Ярцак, ды весе или сэв!”

[ 94 ]Кармась мирьдесь жардо ярцамо. Ярцась, ярцась, весе тензэ эсть сэвевть. Сетьнень потс кадовсь Сия-пейнеяк.

Колмоце чистэ Сия-пейнень кекшизе патясь эсь сундук потмаксозонзо.

Сась мирьдесь и мери: „Сундукто ярцамом сась!”

Патясь мери: „Сэвик ней остатка сундуком! Азё лучи кандык сонзэ тетянь кардайс! Ды ванок, ки ланксо иляк вача, мезе поцонзо, — мон мельгат ванмо карман!”

Овто путызе сундуксть лангозонзо и тусь.

Канды, канды эснэнзэ — мери: „Уй! кодамо стака! ну-ка вачаса, мезе поцонзо!”

Ансяк карми панжомонзо, Сия-пейне тосто серьгеди: „Нейдян, нейдян! Иляк панжо!”

Овто мери: „Неяван! нать аволь васов эщо туинь!” Пуцазо сундуксть мекев лангозонзо ды таго карми кандомонзо.

Аламос кандозь таго пуцазо сундуксть и карми панжомонзо. Сия-пейне таго серьгеди сундуксть поцто: „Нейдян, нейдян! Иляк панжо!”

Истя кандызе овто сундуксть сия-пеень тятянзо кардайс. Каизе кардас кунчкас, а сонсь мекев тусь.

Лись Сия-пейнень тетязо, панжизе сундуксть — тосто кирьнавць Сия-пейне.