Эрзянь ёвкст (М. Е. Евсевьев, 1928)/23
| ←Ёвкс 22 | Эрзянь ёвкст (1928) , edited by Евсевьев, Макар Евсевьевич Ёвкс 23 |
Ёвкс 24→ |
| Эрзянь ёвкст (скаскат). Пурныньзе М. Е. Евсевьев. СССР-энь Наротнэнь Центральной Издательствась. Москов, 1928 |
ОД АВА.
Эрясть атят бабат. Атянь бабань ульнесь тейтерьнест. Бабась прась — кулось. Тейтерьнесь мери: „Тетяй, од ава сайть, тетяй од ава сайть!” Тетясь мери: „Саян, дочам, ды мелезэть туезэ!” Тейтерьнесь мери: „Од авась од паля сусты!”
[ 80 ]Сайсь атясь од ава. Од аванть ульнесь сонсинзэ тейтерезэ. Сонсинзэ тейтерсэнть од авась вечксь, а атянть тейтерьнесэнть эзь вечк. Максь атянь тейтерьнестень раужо сумань пракста и мери: „Азё муськик, ашолгады пракстась сак кудов, ай-ашолгады — иля сак”.
Тусь тейтерьнесь. Муськсь, муськсь пракстасонть, ай-ашолгады пракстась. Каизе пракстанть вец и тусь киява.
Мольсь, мольсь — ваны ки чиресэнть эльде вашиясь. Эльдесь мери: „Тейтерьне, а тейтерьне! урядамак, монськак тенть паро теян!”
Тейтерьнесь урядызе эльденть, сонсь таго тусь. Мольсь, мольсь — ваны ки чиресэнть, скал вазыясь. Скалось мери: „Тейтерьне, а тейтерьне, урядамак, моньскак тенть паро теян!”
Тейтерьнесь урядызе скалсть, а сонсь таго тусь. Мольсь, мольсь — ванцы ки чиресэ реве левксыясь. Ревесь мери: „Тейтерьне, а тейтерьне, урядамак, моньськак тенть паро теян!” Тейтерьнесь урядызе, сонсь таго тусь.
Мольсь, мольсь, ванцы — ки чиресэ сея левксыясь. Мери сеясь: „Тейтерьне, а тейтерьне, урядамак, монськак тенть паро теян”. Тейтерьнесь урядызе, сонсь таго тусь.
Мольсь, мольсь, ванцы ки чиресэ ашти каштомо, — лазновсь весе. Каштомось мери: „Тейтерьне, а тейтерьне, вадьнимак, монськак тенть паро теян!” Тейтерьнесь вадьнизе каштомонть, сонсь таго тусь.
Мольсь, мольсь, ваны — ки чиресэ лисьмине, челькев — нулков весе. Лисьминесь мери: „Тейтерьне, а тейтерьне, ваньцкавтумак, моньскак тенть паро теян”. Тейтерьнесь ваньцкавтызе лисьманть, сонсь таго тусь.
Мольсь, мольсь, тейтерьнесь — ваны ашти кудыне. Совась кудыненьтень. Кудынесэнть яга-баба. „Сюк, сюк, бабакай!” — мери тейтерьнесь. „Сюк аволеть [ 81 ]мерьдеряй, весть сусковлетень, кавсть нилевлетень. Месть тия якат?”
— Авам панимем, — мери тейтерьнесь.
— Азё, ушт баня, — мери яга-бабась, — сувтемесэ ведь кантлек.
Мольсь тейтерьнесь, уштызе, явавтызе банянть. Сувтементь сёвоньсэ вадьнизе — ведь кантлесь.
Сась яга-бабантень ёвтамо. Яга-бабась мери: „Кундамак пильгеде, ускумак банястень ды комель пельде, парямак”.
Тейтерьнесь кетьте кундызе яга-бабанть, ветизе баняс, лопа пельде паризе ды мекев кудов ветизе.
Яга-бабась таргась сундук и мери: „На тенть сундук, кудов молят — панжик!” Тейтерьнесь саизе сундуксть и тусь кудов.
Мольсь, мольсь тейтерьнесь — симезе сась. Ваны — ки чиресэнть ашти сонсинзэ ванцькавтов лисьминесь. Лисьминесь мери тензэ: „Тейтерьне, симть ведьнедень!”
Тейтерьнесь симсь лисьминесэнть и таго тусь ютамо.
Ютась, ютась, — пекезэ вачсь. Ваны — ки чиресэнть ашти сонсинзэ вадневть каштомось. Каштомосонть прякат: „Тейтерьне, а тейтерьне, ярсак прякадон!” Тейтерьнесь ярсась прякадонзо и таго тусь.
Мольсь, мольсь, ваны — ки чиресэ ашти сеянь стада. — Тейтерьне, а тейтерьне! Саимизь минекак мартот! мери тейтерьненть урядавт сеинесь.
— Адядо! — мери тейтерьнесь. Сеянь стадась сыргась мельганзо.
Мольсь, мольсь тейтерьнесь, ваны — ки чиресэ ашти ревень стада. „Тейтерьне, а тейтерьне, саимизь минекак мартот!” мери тейтерьненть урядавт ревинесь.
— Адядо — мери тейтерьнесь.
Сыргась ревень стадаськак мельганзо.
Мольсь, мольсь тейтерьнесь. Ваны — ки чиресэ ашти скалонь стада. „Тейтерьне, а тейтерьне, [ 82 ]саимизь минекак мартот!” — мери тейтерьненть урядавт скалсь.
— Адядо! — мери тейтерьнесь.
Сыргась скалонь стадаськак мельганзо.
Мольсь, мольсь тейтерьнесь, ваны — ки чиресэ лишмень стада. „Тейтерьне, а тейтерьне, саимизь минекак мартот” — мери тейтерьненть урядавт лишмесь.
— Адядо! — мери тейтерьнесь.
Сыргась мельганзо лишмень стадаськак.
Сась тейтернесь кудов. Мартонзо ветясь ниле стадат, — кардазоськак пешкець. Панжизе сундуксть — сундуксь пешксе сиядо ды сырьнеде.
Од аванть сельмезэ сияць. Сон максь сонсинзэ тейтетеренстэнь раужо сумань пракста, панизе муськеме и мери тензэ: „муськик ашолгадмозонзо; ашолгады сак кудов, ай-ашолгады — иля сак!”
Тейтерьнесь муськсь, муськсь сумань пракстасонть, каизе ветьс и тусь киява.
Мольсь, мольсь, мусь ки чирестэ эльде вашиязь. Эльдесь мери: „Тейтерьне, а тейтерьне, урядамак, моньськак тенть паро теян!”
— Мазыян, пароян ды карман тонть урядамот! — и тусь вакска.
Мусь тейтерьнесь вазыязь скал, сеньгак эссе уряда, мусь сея — сеньгак эссе уряда. Мусь каштомо — эссе вадьнек, мусь лисьма — эссе ваньцкавт.
Пачкоць яга-бабантень и мери: „Сюк, сюк! бабакай!”
Яга-бабась мери: „Сюк аволеть мерьдеряй, весть сусковлетень, кавтов нилевлетень! Месть тия якат?”
— Авам панимем! — мери тейтерьнесь.
„Азё ушт баня, сувтемесэ ведь кантлек. Пильгеде баняс ускумак, тенсть комель песэ парямак!”
Тейтерьнесь ушсь баня, сувтемесэ ведь тензэ эзь кантлевть. Яга-бабанть пильгеде ускизе баняс, комель песэ паризе и мекев пильгеде кудов ускизе. [ 83 ]Яга-бабась таргась аксялдо сундук, максызе тейтерьнестень и мери: „Кудов пачкодят — панжик!”
Тейтерьнесь саизе сундуксть и тусь.
Мольсь, мольсь — симезэ сась. Ваны — ки чиресэ лисьмине.
„Лисьмине, а лисьмине, симдимак!” — мери тейтерьнесь.
— Мазыят, пароят, ды кармать монь ветьте симме! — мерсь лисьминесь и эзь макст тейтерьнестень симмекс. Тусь тейтерьнесь апак симть.
Мольсь, мольсь — пекезэ вачсь. Ваны — ки чиресэ каштомо, а каштомосонть прякат.
— Каштомо, а каштомо, тука монень пряка!
— Мазыят, пароят ды кармат монь прякадо ярсамо!
Эзь макст тензэ пряка. Тусь тейтерьнесь вачо.
Мольсь, мольсь, мусь сеянь стада.
— Стадыне, а стадыне, адя монь марто!
— Мазыят, пароят ды кармат сея марто мольме!
Сеянь стадась эзь мольть мартонзо. Мусь ревень стада, ревень стадаськак эзь мольть мартонзо. Мольсь, мольсь, мусь скалонь стада, мейле мусь лишмень стада — нетькак эсть мольть мартонзо.
Сась тейтерьнесь кудов; панжизе сундуксть. Сундуксть поцо куловт.