Эрзянь ёвкст (М. Е. Евсевьев, 1928)/22
| ←Ёвкс 21 | Эрзянь ёвкст (1928) , edited by Евсевьев, Макар Евсевьевич Ёвкс 22 |
Ёвкс 23→ |
| Эрзянь ёвкст (скаскат). Пурныньзе М. Е. Евсевьев. СССР-энь Наротнэнь Центральной Издательствась. Москов, 1928 |
ЗАВАРЗА.
Эрясть-айшсть атят-бабат. Атясь ульнесь охотник. Весть мусь атясь вирьстэ кемгавтово ал. Кандынзе кудов и нарвицька алов путынзе. Листь кемгавтово цёра. Сех покшоньть лемзэ Заварза. Кайсть [ 77 ]цёратне. Кода сась урьвакстома шкаст, Заварза мери: „Тетяй, баславамизь, минь мольдянок эсьтенек козейкань вешнеме!” Тетясь баславинзе и сынь тусть.
Кувать а кувать мольсть, мусть кудыне. Заварза совась кудыненьтень. Кудынесэньть уды яга-баба. Маризе Заварзань совамосто и мери: „Ломань чине качады. У! сэвдян!” — „Нет, а сэвсамак!” — Заварза мери.
Яга-бабась мери: „Мейсь тон сыть?”
— Козейкат вешнетянок, — Заварза мери, — монь кемгавтово братон, эрьвейкенень эряви козейка.
Яга-бабась мери: „Азё монь патянь улить кемгавтово тейтерензэ, ансяк трудна сынст саймекс. Но мон максан тенть айгор и паця. Айгорось ёвты тенть, кода теемсь, а пацясонть кодак авулдат, тееви толонь моря”.
Заварза ёвтась яга-бабанень пасиба и тусь.
Мольсть, мольсть — мусть таго кудыне. Тесэ эри омбоце яга-баба. Те кучинзе сынст эщо патянстэнь.
Пачкоцть и колмоцентень. Совась кудоньтень Заварза. Тосо уды яга-баба. Стясь яга-бабась и мери: „Ломань чине качады, умок эзинь ярца ломаньде, сэвдян!” — „А сэвсамак, шайтян баба! мон тонть весе родоткак машца!”
— Ну, иля пижне, ёвтак, мейсь сыть?
— Мон маринь, тонть улить тейтереть!
— Да улить!
Совавтынзе тейтерьтнень кудос. Тейтерьтне весе ве лицясот. Заварза лись кардайс айгоронзо ваксс. Айгорзо мери тензэ: „Вант, Заварза, яга-баба тонть и братот чавмонк думась. Тон вана мезе тейть: веть, кода мацтядызь, тон тынсинк одижатнень орчавты яга-бабань тейтертьнень ланкс, а сынст одежатьнень тынсинк ланкс”.
Заварза истя и тейсь.
Веть яга-баба весе сонсинзэ тейтерьтнень печксинзе, каць ансяк вейке, думась, что те Заварза.
[ 78 ]Стясь валське, — ваны — тейтерензэ весе печксезь. Седеяк кежензэ састь. Заварза лись братонстэнь и мери: „Тынь азёдо кудов, а мон а молян, — мон муинь эстень козейка”.
Братнэ тусть, а Заварза салызе веть яга-бабань живстэ кадовсь тейтеренть, ускизе ве таркас и мери: „Молят монень козейкас?”
— Азё, авань айгоронзо пурны, сестэ молян.
Тусь Заварза. Пачкоць айгортнэ ваксс и кармась пурнамо. Яга-бабань ойгорзо, кона вансь лият айгортнэсэ, арць Заварзань айгоронтень и пстидизе. Заварзань айгорось копыта видьга модас пезнась. Мейле Заварзань айгорось кода пстицы яга-бабань айгоронть, тона кумажава пезнась. Заварзань айгорось эщо хотел пстидмензэ, но тона мери: „Илямак пстить, — мон Заварзанень айгортнэнь пурнасынь”.
Тусь пурнынзе и панизь.
Марясь Яга-баба и тусь Заварзань мельга. Цют-цют эзизе саса Заварзань. Заварза пацясо авулдась и теевсь толонь моря. Яга-бабась кирнавтыксэль троксканзо, но пицевсь и велявсь. А Заварза ульнесь тона берёксо. Яга-баба мери тензэ:
— Заварза, сат монень госькс?
— Сан! до корен розорятан, шайтян баба!
Заварза панинзе айгортнэнь тейтерентень и мери: „Я, ней молят козейкакс?”
— Азё, авань гуслянзо салы, сестэ молян!
Тусь Заварза. Пачкоць яга-бабантень. Совась кудонтень. Яга-бабась уды, гуслятне путозь груцэнзэ. Мольсь Заварза ваксозонзо, кепединзе гуслятнень. Яга-бабась сыргойсь, кундызе Заварзань кетьте и мери: „А! ней понгить!”
Саизе Заварзань сюлмсизе, айгоронзо пекстызе карц панжума экшс, сонсь яга-бабась тусь сазоронзо кис.
Айгорось мери Заварзанень: „Заварза, седяк гуслятнесэ!” Заварза кармась седямо. Кардо [ 79 ]панжуматне прасть и соньсь Заварза укстевсь. Заварза седе курок саинзе гуслятнень, озась айгоронть ланкс и тусь.
Яга-бабась маризе седямодо, велявць и тусь Заварза мельга. Цют-цют эзизе саса. Заварза пацясонть авулдась и теевсь толонь моря.
— Заварза! сат монень госькс?
— А сан! — Заварза мерсь.
Яга-бабань кежензэ сасьть, — кирнавць морянтень и тоско пись.
Заварза гуслятне марто тусь тейтерентень и мери: „Я, ней молят тень козейкакс?”
— Азё, авань щека ловажанзо кандык, сестэ молян.
Заварза мольсь, таргизе яга-бабань берёк ланкс, керизе щека боканть и кандызе тейтерентень: „Я, ней молят козейкакс?”
— Вана те котёлонть пачк листь, сестэ молян.
А котёлсь озорнойшка, ведьте пешксе, лаки. Заварза пелезевсь. Айгорзо мери: „Заварза, иля пель — листь!”
Заварза кирнавсь котёлонтень. Айгорзо паркстась котёлонть ланкс, ведесь кельмесь, и Заварза лись. Мольсь тейтерентень и мери: „Ну, ней тон листь котёлонть пачк!”
Тейтерсь кирнавсь. Айгорось опеть паркстась — ведесь седе-як пек кармась лакамо, и яга-бабань тейтересь тоск пись.