Эрзянь ёвкст (М. Е. Евсевьев, 1928)/18

From Wikisource
Jump to navigation Jump to search
Эрзянь ёвкст  (1928) 
Эрзя ломанть, edited by Евсевьев, Макар Евсевьевич
Ёвкс 18
Эрзянь ёвкст (скаскат). Пурныньзе М. Е. Евсевьев. СССР-энь Наротнэнь Центральной Издательствась. Москов, 1928
[ 66 ]

ЯГА-БАБАНЬ ТЕЙТЕРЬ.

Эрясть-айшть атят бабат. Атянь бабань ульнесь вейке тейтерест. Эрясть сынь вельть сюпавсто. Тусть ават-тейтерть вирьга якамо. Якасть, якасть, сась авасть симезэ. Лись ваксозост яга-бабань тейтерь, максь авастень сад-умарь и мери: „Суск сад-умарьденьть”. Авась сусксь и теевсь скалкс.

Яга-бабань тейтерьсь мери аванть тейтерьстень: „Тон иля ёвта тетятень: ават яла теке а велявты ломанькс, — мон улян тенть авакс”.

Састь кудов. Тетясь арасель кудосо. Сась тетясь, неизе скалсть и мери: „Те кинь скалсь?” Авась мери: „Мон рамия!” Тетясь каясь тикшеть — скалсь а ярцы. Тетясь мери: „скалсь а ярцы тикшеде — эряви печкемс”. Тейтерьсь маризе тетянть. Лись кардайс скалсть вакс и мери: „Авай, тонть печкеметь арсить”.

Авась мери: „Кадык печксамизь, — тон ансяк монь рогатнень кавонест кекши; колмо чиде мейле пувак пачкаст, мон мекев ломанькс велявтан”.

Саизь скалонь ды печкизь. Тейтерьнесь саинзе кавонест рогатьнень ды кекшиньзе.

Омбоце чистэ яга-бабань тейтерсь мери тейтерьнестень: „Азё бабанень штерень кисэ. Сон эри вирь кунчкасо кудынесэ.”

[ 67 ]Тусь тейтерьнесь. Мольсь, мольсь вирьганть, муизе кудыненть. Совась кудостень — тосо яга-баба. Яга-бабась мери: „Уй! ломань чине качады. Мейсь сыть, дочам?”

— Авам штерень кис кучимем!

— „Ну, сак, озак ды штерть, мон молян баня уштан, — банясо парятан. Вачидеряй пекеть, — каштотсо ули сывель и каша. Ой шакшкесь пизыне прясо — ярцак!” Яга-бабась тусь баня уштомо, тейтерьнесь озась штерьдеме.

Штерць, штерць — пекезэ вачсь. Таргизе сывельсть каштотсо и арци: каня ярцамс, каня а ярцамс.

Лись аксялдо каткине и мери: „Патькай, а патькай! тука монень сывель сускомнэ, монськак тенть паро теян!”

Тейтерьнесь саизе ды весе сывелень максызе каткинестень.

Каткинесь максь тензэ сэме ды нардамо и мери тейтерьнестень: „Азё тон седе курок кудов: яга-бабась арци тонть банясо пидеметь и сэвметь.”

Тейтерьнесь каподизе пизыне прясто ой шакшкенть и лись кардайс. Ортась мери тензэ: „Тейтерьне, а тейтерьне, каяк кочкарязон ой пенчке.” Тейтерьнесь каизе оень шакшнэк орта кочкаряс.

Лись тейтерьнесь ульцяв. Яга-бабанть вальмало ашти умарина. Умаринась мери: „Тейтерьне, а тейтерьне, сивсь монь тарадом, сюлмик!”

Тейтерьнесь укстизе пуло пестэнзэ лентучканзо, сюлмизе умаринань таратьсть и чиезь тусь кудов.

Сась яга-бабась вальманть алов и мери: „Тейтерьнем, штерьдят?”

Каткинесь каршонзо пшкаць: „Штерьдян, бабай, штерьдян!”

Совась яга-бабась кудос — тейтерьне арась. Мери каткинестень: „Тейтерьнесь оргоць, мейсь тон монень эзить ёвта?” Каткинесь мери: „Сон монь сывельде андымем — секс эзинь ёвта”. Яга-бабась сайсь палка [ 68 ]и давай катканть чавмо. Каткась кода кундасазо яга-бабань пря кетьте — весе пря кедензэ ваткизе. Яга-бабась мери: „Инескеть, каткине, нолдамак, а карман эснэть чавмо”. Каткинесь нолдызе.

Лись яга-бабась кардайс и мери ортастень: „Тон, мейсь, орта, нолдык тейтерьненть, — эзить чикорт?”

Орта мери: „Сон монь кочкарям ойсэ вадьнизе, секс эзинь чикорт”.

Яга-бабась кода саи палка и давай ортань палкасо чавмо. Ортась сяворць яга-бабанть ланкс и лепштизе. Яга-бабась мери: „Инескеть, орта, нолдамак, а карман чавмот”. Орта нолдызе.

Лись яга-баба вальмалов и мери умарь чувтостень: „Тон мейсь, умарь-чувто, нолдык тейтерьненть, — эзить шума?”

Умарь-чувтось мери: „Сон монень лентучканзо максызе, сивсь тарадом сюмсизе, секс эзинь чикорт”.

Яга-бабась сайсь палка и давай умарь-чувтонь чавмо. Умарь чувтось кода карми сонсинзэ яга-бабанть сельме ланга таратсонзо хропаеме. Яга-бабась пижни тензэ: „Инескеть, умарина, лоткак, а карман эснэть чавмо”.

Умаринась лоткась.

Яга-бабась озась човарс, сайсь кедезэнзэ петкель и давай тейтерьне мельга паньме. Арды тейтерьненть мельга, а соньсь пижни: „Човар арт, петькель панть”.

Арць, арць, кармась тейтерьнень сасамо.

Тейтерьнесь саизе ды ёртызе удалонзо сэменть. Теевсь вирь — кедьгак потмованзо а тонгуват.

Яга-бабась кармась вирьсэнть порьме. Порсь, порсь — поризе и давай таго тейтерненть мельга ардомо; арды а соньсь яла пижни: чавар арт, петькель чавт. Арць, арць таго кармась тейтерьненть сасамо. Саизе тейтерьнесь ды ёртызе нардамонть, сонсь тусь таго чиезь.

[ 69 ]Теевсь моря. Яга-бабась арцесь, арцесь моря чиресэнть, совась вецтень. Ватракшнэ кода кундасызь, — кона ськири эснэнзэ, кона суски. Яга-бабась лись вецтэнть и мурдась мекев кудов.

Сась тейтерьнесь кудов и мери тетянстэнь: „Тетяй, те аволь миньсинек авась, — сон яга-бабань тейтерь. Сон монь кучлимем аванстэнь штерень кис. Авась монь сэвиксылимем, кой-как мон оргедевинь кецтэнзэ. Минсинек аванть яга-бабань тейтерсь скалокс теизе, тон печкик сонзэ. Роганзо мон кекшинь, сон колмо чийде мекев ломанькс велявты.” Тетясь саизе яга-бабань тейтерсть, сюлмизе сисемь иесэ айгоронь пулос и панизе дикой паксяс.