Эрзянь ёвкст (М. Е. Евсевьев, 1928)/15
| ←Ёвкс 14 | Эрзянь ёвкст (1928) , edited by Евсевьев, Макар Евсевьевич Ёвкс 15 |
Ёвкс 16→ |
| Эрзянь ёвкст (скаскат). Пурныньзе М. Е. Евсевьев. СССР-энь Наротнэнь Центральной Издательствась. Москов, 1928 |
ГУЛЬКИНЕ.
Эрясть-айшть атят бабат кавонест. Ульнесть сынст кавто эйкакшост: цёрыне да тейтерьне. Бабась прась ды кулось. Кадовсть эйкакшнэ ававтомо. Сынь чистэ мерить тетястень: „Тетяй, сайть од ава! тетяй, сайть од ава!”
Тетясь мери тенст: „Саян, эйдень, да мелезэнк туезэ”.
— Мейсь а туи? Сайть!
Тетясь сайсь од ава. Эрясть-айшть аламос. Од ава мери тетястень: „Печкик цёрынеть, карман мартот эрямо, а печксак — а карман!”
Тетясь кулцонызе нинзэ, печкизе цёрынензэ. Од авась пидизе и озасть столь экшс ярцамо, а тейтерьненть панизь кенкш уголс.
Ярцыть сывельденть, ловажатьнень ёртлить кенкш уголс, тейтерьненть ланкс. Тейтерьсь аварьди и мезе ёртыть лангозонзо ловажатьнень — пурны. Кода весе ловажатьне пурнавсть, сюлминзе ашо пацинес и путыньзе пизыне пряс.
Пизыне прясонть ловажатьне теевсть гулькинекс. Либор мерьнесь гулькинесь, ливтясь ульцяв.
Юты ульцява уронь микшниця. Гулькинесь валксь чирьке прязонзо и мери тензэ: „Уронь микшниця, а уронь микшниця! тука тень ве коморо урот, моро тенть моран”. [ 61 ]Уронь микшницясь макссь тензэ коморо урот. Гулькинесь кармась морамо:
| „Гулдор- | гув- | гув- | гув! | Эсь тетинем печкимем. |
| " | " | " | " | Од авинем пидимем. |
| " | " | " | " | Прякавтомо сэвимизь. |
| " | " | " | " | Патинень ланкс ёртлимизь. |
| " | " | " | " | Монь патинем пурнымем. |
| " | " | " | " | Ашо пацяс сюлмимем. |
| " | " | " | " | Пизыне пряс путымем. |
| " | " | " | " | Мон гулькинекс теевинь.” |
Морызе моронть гулькинесь и таго тусь ливтямо. Юты карчозонзо салмуксонь микшниця. Гулькинесь озась чирькензэ пряс и мери: „Салмуксонь микшниця, а салмуксонь микшниця! Тука монень ве коморо салмукст, моро тенть моран!”
Салмуксонь микшницясь макссь тензэ коморо салмукст. Гулькинесь морызе тензэ секе моронть и тусь таго ливтямо.
Юты карчозонзо медень микшниця. Озась гулькинесь чирькензэ пряс и мери тензэ: „Медень мкишниця, а медень микшниця! Тука монень ве пенчь медь, моро моран тенть”. Медень микшницясь макссь тензэ медь. Гулькинесь кармась морамо: „Гулдор-гув-гув-гув! Эсь тетинем печкимем.”
Моравсь морозо, таго тусь ливтямо. Ливтясь мекев кудов. Озась кудо кенкш вельксэс и кармась морамо:
| „Гулдор- | гув- | гув- | гув! | Эсь тетинем печкимем. |
| " | " | " | " | Од авинем пидимем. |
| " | " | " | " | Прякавтомо сэвимизь. |
| " | " | " | " | Патинень ланкс ёртлимизь. |
| " | " | " | " | Монь патинем пурнымем. |
| " | " | " | " | Ашо пацяс сюлмимем. |
| " | " | " | " | Пизыне пряс путымем. |
| " | " | " | " | Мон гулькинекс теевинь.” |
[ 62 ]Маризе морамодо тетязо. Панжизе кенкшенть и ваны верев кургонь автезь. Гулькинесь каиньзе кургозонзо коморо уротьнень. Тетясь повавсь ды кулось.
Гулькинесь таго кармась морамо: „Гулдор-гув-гув!!.” Маризе од авась. Лись кудыкелев, автизе кургозо и кулцони. Гулькинесь каиньзе кургозонзо коморо салмукснэнь. Повавсь од аваськак и кулось.
Гулькинесь таго кармась морамо: „Гулдор-гув-гув”. Маризе патязо. Лись кудыкелев и кулцони. Гулькинесь каизе кургозонзо медь пенченть, а сонсь теевсь мекев цёрынекс и кармасть патянть марто кавонест эрямо.