Эрзянь ёвкст (М. Е. Евсевьев, 1928)/04
| ←Ёвкс 3 | Эрзянь ёвкст (1928) , edited by Евсевьев, Макар Евсевьевич Ёвкс 4 |
Ёвкс 5→ |
| Эрзянь ёвкст (скаскат). Пурныньзе М. Е. Евсевьев. СССР-энь Наротнэнь Центральной Издательствась. Москов, 1928 |
КОДА ДУРАК САЛОНЬ РАМАМО ЯКАСЬ.
Эрясть айшть атят бабат кавонест. Ульнесь сынст ве цёрынест — дурацьке. Атясь прась ды кулось. Бабась калмизе. Пурнась бабась поминкат; дурацьке цёранть кучизе салонь рамамо.
— Азё, мери, цёрынем, батман сал рамак!
— Молян, — мери цёрынесь.
— Азё, ды ванок, иляк стувт, зняро рамамс! — тон кува молят, яла мерьть: батман, батман, ато стувцак!
Тусь дураксь, сонсь кува моли, „батман, батман!” мери.
[ 19 ]Пачкоць тинге-пире виц. Тинге-пиресэнть товзюро пивсыть. Сон мери тенст: „Батман, батман, чоп пивсэде, батман пивсэде!”
Пивцыцятьне кода кундасызь дураконь и давай чавмонзо. Чавсть, чавсть, — нолдызь.
Сась кудов дурацьке, — аварьди.
— Мейсь аварьдят, дурацьке? — авазо кевстизе.
— Мейсь? Мон кода лисинь кудосто, моньсь ютан, моньсь яла мерян: батман, батман. Пачкодинь тинге-пире виц, тосо товзюро пивсыть. Мон меринь тенст: чоп пивсэде, батман пивсэде! Сынь кундымызь монь, — чавимизь, чавимизь ды нолдымизь!
— Эх, дурак, тон меревлеть тенст: сядонь-сядонь пивсэде, — вейте-вейте илядо!
Таго тусь дурак. Кува юты сеери: сядонь, сядонь! сядонь, сядонь!
Кандыть карчонзо кулозь ломань калмамо. Сон мери тенст: „Сядонь-сядонь кулодо, — вейте-вейте илядо!”
Кандыцятьне кода кундасызь дурацкень и давай чавмонзо. Чавсть, чавсть — нолдызь. Таго кудов сась дурак аварьдезь.
— Мейсь таго аварьдят?
— Ды, мейсь? ютан киява, карчон кандыть кулозь ломань, — мон меринь тенст: сядонь-сядонь кулодо, вейте-вейте илядо! Кандыцятьне кода кундасамизь, — чавимизь, чавимизь ды нолдымизь?
— Эх, дурак, тон меревлеть тенст „царства небесной!”
Таго тусь дурак. Карчонзо арды свадьба. Дурак мери свадьбастень: „Царства небесной тенк!” Кудатьне кода кундасызь дураконь, чавсть, чавсть эснэнзэ — нолдызь.
Дурак таго сась кудов аварьдезь, и ёвтнизе аванстэнь — мейсь чавизь.
Авазо мери тензэ: эх, дурак, дурак, — несак свадьба арды, — каявлить понксот ды киштевлеть!
[ 20 ]Таго тусь дурак. Ваны — пожар, — ве атянь остатка кудынезэ палы. Сон мольсь пожарсть вакс, каинзе понксонзо и давай киштеме. Атясь кода кундасазо, давай чавмонзо. Пельс-куломс чавизе ды нолдызе. Сась кудов дурак аварьдезь, ёвтлизе аванстэнь, мейсь чавизь. Авась мери: „Эх, дурак, дурак, — тон саевлеть ведь, ды мацтявлек пожарсть”.
Дурак таго тусь лия превь марто.
Ки ланксо ве атя туво кирты. Сон кода саи ведра ды давай толонть мацтямо. Атясь кундызе дураконь и давай чавмонзо. Чавсь, чавсь — нолдызе.
Таго сась кудов аварьдезь и ёвтнизе аванстэнь, мейсь чавизь.
Авась мери: „Эх, дурак, тон бу меревлеть бог помочь тензэ.”
Таго тусь дураксь. Ки чиресэ поп серьни. Сон мери тензэ: „Бачка, бог помочь тенть!” Кода кундасазо попось! Чавсь, чавсь эснэнзэ — нолдызе.
Сась кудов таго аварьди. Авась таго кучиксэльсе, вансазо дураконь киськенть весе шишкат-палкат саизь, и эсьсе кучт. Кадовсь батман салост апак рамак.
П о с л о в и ц а: Дурак мельга лукушкасо превть а кантливат!