ЛОТКАК, ВАРМА
Шинясь шоподсь.
Кельме вармась уфси,
Уфсезь — тошказь
Мора морай фкакс:
„Машась Ванять,
Ванять ширес сувси,—
Йорай молемс
Ваняти урьвакс”.
Лоткак, лоткак
Морамода, варма,
Няйса кяльцень
Шовасак зря.
Машать седиц
Пою лопакс тарнай,
А тонь мяльсот
Мирде и урьвя.
Няйса монга,
Машась Ванять кельгсы,
Кода сетьме,
Мани венять ковсь,
Аньцек сьоксесь,
Сьоксесь Ванять нельгсы:
Армияв туманцты
Маладсь ковсь.
Вярьгя ковнясь
Акша мацикс якай,
Кельме валдонц
Йорясы ульцяв...
Машать верняц,
Кода ведьне лакай:
[ 69 ]
— Ах, мес тячи
Менельсь аф туцяв!
— Кулхцондт, Ваня,
Кулхцондт, мезе азан:
Кали меки
Теень аф мрдат?
Ломатть корхтайхть,
Бта эсон кадат,
Аф стак тяни
Афи ктморят.
— Кие, кие
Тяфта корхтай?
Кие ноляй
Инголет туман?
Кельгомдот монь
Мяльнезе аф лоткай,
Лия Маша
Костук аф муян,
Туян, молян,
Молян, Маша, тоза,
Коса тонафтф
Улян войнань тевс.
А тяни... тяни...
Машать седиц озась...
Ковсь аф азы
Мезе тячи няйсь.
Тяни тонга
Лоткак, кяжи варма,
Кяльцень эса
Тят шова зря.
Кафта кизось
Ваняти аф сталма.
Ну, а тядде
Аф сяви урьвя.
1929 к.
|
|