'Na note, a un'ongia a un spigolo

'Na note, a un'ongia a un spigolo
bianco, lustro de luna,
do moroseti timidi
vardava la laguna,
e i diseva: "Podessimo
lontani scampar via,
basarse, darse l'anema,
lontani d'ogni spia".
La luna, là su in cielo,
ste parolete sente
la se slonga bel belo
la riva a tocar l'aqua,
le ondete un fià la frua,
co l'aqua la se inturbia,
co l'aqua la se stua:
tuto quel bianco spigolo
xe fato carbon nero;
resta do ponte luçide
come l'arzento e 'l fero.
Dixe la luna ai timidi
tosi: "Montè, no scoto!
Galegio sora l'aqua,
co un remo déme el moto.

E andè lontan da ciacole,
çerchè la vostra pase,
basève franchi e libari,
fé quelo che ve piase!
Stanote dago incarico
a le stele più bele
de far ciaro: le nuvole
no scondarà le stele!".

I moroseti timidi
l'oferta ga açetà:
co' un remo sora l'aqua
la luna à navegà:
fora del mondo i tenari
basi gera permessi,
gnanca le stele limpide
fava petegolessi!...
 
Cussì nasse la gondola,
galanteria dell'aqua
fata per sta laguna:
rica barcheta nera
longa fina liziera,
co do ponte de fero
co do ponte de arzento
se la deve al talento
de un'ongieta de luna
che, co tanto bon cuor,
ga proteto una sera
el picolo mistero
de do tosi in amor.